May 24, 2023 (Rauthla) : I&PR Deputy Director Pu K. Saitluanga, MIS chuan vawiin atanga neih tan, Samagra Shiksha hnuaia Grassroot Sports Development Programme (GSDP) Mizoram State Level Football intihsiak hmasa ber, Serchhip Sports Complex-a neih chu khuallian niin a hman pui a. Pu K. Saitluanga chuan "Nangmahnia awm theihna haichhuak tura sawrkar hmalakna hlutzia hriain, he remchang hi hmang tangkai ngei ang che u" tiin naupang kalkhawmte a chah.
Khuallian chuan, Mizo thalaite zingah Football khela eizawng thahnem tak an awm tawh a, an awm belh zel bawk a. Football Players Association of India (FPAI) ten kumina an zinga India Football Player tha ber atana an thlan pawh Mizo tlangval Lallianzual Chhangte a ni. Vawiina intihsiaknaa rawn tel Samagra Shiksha hnuaia Grassroot Football-a bul tan mekte zingah hian India ram aiawha khel thei khawpa theihna nei, player tha tak tak la ni thei tur kan awm ka ring, a ti.
Grassroot Sports Development Programme hi Samagra Shiksha hnuaia hmalakna pakhat niin, kum 2022 atanga kalpui tan a ni a. Mizoram pumah Football hi Centre 13 awmin Aizawl leh Lunglei district ten Centre pahnih ve ve neiin district dangten Centre pakhat theuh an nei.
Vawiina bultan football intihsiakah hian Grassroot Football Centre 13 atangin District tin aiawhin team 11 an inlan dawn a, Aizawl leh Lunglei District ten Centre pahnih ve ve nei mah se team khat angin an rawn inlan a, district dang zawngten team khat theuh an nei ang.
Post a Comment