May 2, 2023 (Rauthla) : Prof. Dibakar Chandra Dekar chuan nimin khan Mizoram University Vice Chancellor ni turin hna a zawm a. Acting Vice Chancellor Prof. Pravakar Rath chuan VC office chamber-ah charge a hlan a ni.
MZU Auditorium-a amah lawmna inkhawmah Acting Vice Chancellor Prof. Pravakar Rath chuan Vice Chancellor lawmna thu sawiin, VC thar chuan MZU ah kum nga hun a neih chhungin MZU chu kawng dikah a hruai a duhsak thu a sawi.
Prof. Dibakar Chandra Deka hi Mizoram University Vice Chancellor pangana niin nimina charge a lak hnuah, MZU thawktute chungah lawmthu sawiin thawhhona tha tak nen Mizoram University chuan hma a sawn zel tur thu a sawi a, a short term plan hmasa berah MZU chu NAAC assesment lo awm turah A++ grade thlenpui ngei a tum thu a sawi a. VC thar chuan MZU chu naupangte nimahse India ram University thang chak ber pawl a nih thu a sawi.
Prof. Dibakar Chandra Deka hian Cotton College atangin B.Sc (Hons) a zova, Gauhati Univeristy atangin M.Sc zo lehin, M.Tech & Ph.D chu IIT Kharagpur atangin a zo leh bawk a. Post-Doctoral Diploma chu Tokyo Institute of Technology Japan-ah a zo leh a, D.Sc chu Gauhati Uiversity-ah a zo thung.
Kum 1997 khan University of Manchester UK-ah Commonwealth Visiting Fellow niin, The Research Board of Advisors, the American Biographical Institute USA-ah member a ni bawk a, kum thum chhung All India Association of Chemistry Teachers President-ah thlan a ni tawh bawk.
Post a Comment