Lunglei, May 10, 2023 : Vawiin khan Mizoram Governor Dr. Hari Babu Kambhampati chuan Lunglei tlawhin, DC Office, Lungleiah Lunglei District Head of Office-te, Bank Manager-te leh VC Association hruaitute meeting a neihpui.
Mizoram Governor Dr. Hari Babu Kambhampati chuan sawrkar in mipuite tana scheme tha tak tak a siamte anih tur ang ngeia tangkai taka hman an nih theih nan Department-te chuan mipui pan hmasak nghak lova, a tul apianga pen chhuaka mipuite kan zirtir nasat a tul takzet a ni, a ti a. District ti hmasawn zel turin Bank ten mawhphurna pawimawh tak an nei a ni tiin, sawrkar laipui scheme hrang hrang- Pradhan Mantri Jeevan Jyoti Bima Yojana (PMJJBY), Pradhan Mantri Suraksha Bima Yojana (PMSBY), Atal pension Yojana (APY), Pradhan Mantri MUDRA Yojana (PMMY) leh a dangte pawh mipui tam zawkin an hman tangkai theih nan theihtawp chhuah turin a chah bawk.
Pi Ramdinliani, Lunglei Bawrhsap report pek dan chuan tunah hian Lunglei District 4056.58 sq.Km a zauah hian mihring 1,35,315 vel an cheng mek a. Village Council 113 a awm a, Civil Sub Division 2, RD Block 4 a awm a, Assembly Constituency 6 a awm bawk a ni.
Head of office-te meeting a neihpui zawhah hian Governor chuan kohhran hruaitute, NGO hruaitute, Pradhan Mantri MUDRA Yojana (PMMY) beneficiary-te, LMC Councillor-te leh political party-te inkawmhona hun a hmanpui bawk.
Vawiin vek khan Governor hian 20 Bn BSF-te an Headquarter tlawhin, mi harsa insak tanpuina scheme PMAY (U) beneficiary te pahnih a hmunah a tlawh bawk a ni.
Governor leh amah zuitute hian naktuk chawhma ah Hnahthial District panin Lunglei an chhuahsan dawn a ni.
Post a Comment