Lawngtlai, May 30, 2023 : Lawngtlai District Level Committee on Green Mizoram chu vawiin khan Lawngtlaiah SDO (Sadar) Pu Daniel Sailo hovin Lawngtlai DC Conference Hall-ah an thukhawm a, Lawngtlaia Green Mizoram Day hman tur an rel.
Vawiin thutkhawmah hian Green Mizoram Day, June 11 chu Pathianni a nih vangin June 9, 2023 ah hman nise an ti a. Kumin hian Kaladan Multi Modal Transit Transport Project kawngpui kam, nikum lama thingphun tawhna hmabakah thing tiak 380 phun nise an ti a. Kumin Green Mizoram Day thupui atan 'Thingphun ila, enkawlzui ang u' tih hman a nih thu sawilan niin, thupui behchhan hian Department hrang hrang ten an thingphun enkawl zui se, nakum Green Mizoram Day hman hunah Thingphun enkawl tha ber hnen h lawmman hlan nise an ti.
Green Mizoram Day puala inkhawm tawi chu thing phunna tur hmun remchangah hman tur niin, Deputy Commissioner, Lawngtlai chu khuallian a ni ang. Khuallian ho hian State leh LADC a mi pawimawh ten a bika thing an phunna tur ruahman tur a ni a, he hunah hian kangmei veng tha khua / Veng thlanchhuahte hnenah lawmman hlan a ni ang.
Member Secretary Pu K. Lalromawia, Deputy Conservator of Forest, LADC chuan Green Mizoram Day hman dan tlangpui sawifiahin, nikuma thing 350 phun chu a vaia a nun vek thu leh nguntaka enkawl zui a nih thu a sawi.
Vawiin Meeting-ah hian Sorkar Department hrang hrang hotute, Zirna In leh Tlawmngaipawl aiawhte, District MJA hruaitute an tel.
Post a Comment