Rauthla Editorial (May 23, 2023 : Hnam nihna (Identity) lanna tak tak chu Tawng (languguage) hi a ni a, tawng a ral/bo chuan kan hnam nihnain awmzia a nei tawh lo tihna a ni.
Laifate hian a hrana ro inrel theihna kan nei a, hei hi kan tawng humhalhna kawngah pawh a pawimawh hle. Lai Autonomous District Council chhunga mite mihring zaa sawmriat bawr vel hian kan hnam tawng, Lai tawng kan hmang lova, hmang turin kan thiam hek lo. Hetih lai hian Lai origin ni lo, hnam dangin min chim zel nen, kan hnam tawng hi zawi zawiin a ral ang tih hlauhawm tak a ni.
LADC sorkarin Lai tawng kan hman tam theih nan tan a la a, office file leh office order te pawh Lai tawnga a tam zawk tihchhuah leh hman/kalpui a ni. Hei hian sawtna tam tak hring mahse, a tam zawkin Lai tawng kan thanhnan tawh miau loh avangin mipui tam zawk tan harsatna mai niin a lang.
Kan hnam tawng heti tak maia a tlahniam leh kan hmang uar lo hi hmang uar turin engtinnge tan kan lak ang tih hi kan Laifa mithiamte pawhin an ngaihtuah ngeiin a rinawm. Mahse, a solution leh a result chu kan la hre lo deuh a nih hi. Tawngah a tam zawkin harsatna kan nei a, kan pianna hmunin zir loh avangte, kan chhungkua dinhmun avangtein Lai tawng kan hmang tam thei lo. Tuna mite hi chu in zirtir viau mahila, a sawt mawh khawp mai. Naupang atanga tan kan lak a tul.
Tawngah harsatna kan tawh mek lai hian Lai tawng a bo loh nan leh kan chhawm nung zel nan kan hmun hming, khaw hmingte Lai tawnga thlak nise tih hi ngaihtuahnaah a awm ve thin. Lai Womens Association Conference aiawh rorel vawi-9-na zirtawpni, May 19 a LADC Hall-a neih chuan Lai District huamchhunga Lui, Tlang leh khaw hmingte hi Lai tawnga thlakna nih theih nan LADC ah thlen ni rawh se, tih an rel leh hmalakna an kalpui tur hi a lawmawm hle. Hei hi kan LADC sorkar pawhin bengkhawn sela, kan tawng a bo loh nan leh kan tawng hmangtu kan tlem tial tial chunga kan tawng kan humhalhna pawimawh tak a ni tih hi an hriat a ngai a ni. Kan Mara unau lam pawhin hei hi kalpui tawhin, an inchhir lo khawp mai. Kan tawng a ral zel loh nan kan hmun hming, lui leh tlang hming, khaw hmingte hi Lai tawnga thlak hi a pawimawh em em a ni.
Post a Comment