Lawngtlai, April 20, 2023 : Vawiin khan Er. Ramdinsanga, Executive Engineer, Power & Electricity Department chuan Lawngtlai District MJA te thingpui inpuiin, hmasawnna tur hrang hrangte an sawiho.
Er. Ramdinsanga chuan electric bill dik lo, bill sang/tam lutuk leh hniam lutuk ang chi awm te chu an hriat thu a sawi a, hetiang buaina hi a awm tawh loh nan hmalak mek tum a ni a, meter reader te pawh kohkhawm thuai an ni ang, a ti a. Lunglei atanga kawlphetha lakna hruipui leh Chawnhu Lawngtlaia khawl te chu tichangtlung turin hmalak mek a ni a ti a, Paithar tlangdung paltlang Bungtlang South Power line chu KMMTTP kawngpui hrulah sawn tum a nih thu a sawi a, Parva-III a Raltlan ten kawlphetha hman man an chawi chungchang zawhna chhangin EE chuan Energy chu a thlawna hman ngawt theih a ni lova, an tana phurrit lo turin a hmingin Connection pakhatah thlakhatah Rs.50/- chawi tura tih an nih thu a sawi.
Er. Ramdinsanga, EE chuan "duh ang diak diaka hnathawh hi a harsa hle a, hmunpui lam aṭanga power kan hmuh ṭhat chuan eng hi kan pe chhuak kim thei ṭhin. Harsatna kan tawh ber chu thawktu kan indaih lo hi a ni" a ti.
Lawngtlai District MJA President Pu Lalngheta Ralte chuan Lawngtlai District hian hmangaihtu a mamawh a, Lawngtlaia officer lo awm te pawhin a neitu rilru pua Lawngtlai District hmasawnna atan a theihtawp chhuah tura a duh thu a sawi a. Power & Electricity Department in a theih ang anga hmalam an pan zel chu lawmawm an tih thu sawiin, mipui phurrit siamsak lo zawnga inherrem chho zel tura an duh thute sawiin, P&E Department in an rawngbawlsak mipuite ngaipawimawha Power dinhmun rang taka an puangzar thin chu lawmawm an tih an sawi.
EE chuan chanchinbumi ten an Department hmasawnna tura rawtna an neihte chu theihtawp chhuaha lo bawhzui a tum thu a sawi.
Er. Ramdinsanga hian March 28, 2023 khan a hna hi a rawm zawm a ni.
Post a Comment