Lawngtlai, April 3, 2023 : Vawiin khan Pu VL. Hmuaka, Chairman LADC kaihhruaina hnuaiah LADC budget session ni thumna neih chhunzawm a ni.

Vawiin session-ah hian zawhna leh chhanna hun hman niin, zawhna pangnga (5) awmin chhan vek a ni a, Official Business, Discussion Of Lai Autonomous District Council Budget 2023 - 2024 neih nghal a ni bawk.

Vawmbuk bialtu MDC Pu T. Zakunga zawhna chhangin LAD changtu EM Pu Rongura chuan Thaltlang VC member pahnih ten banna an thehluh thu leh hemi chungchangah hian thu tawp siam a la ni rih lo, a ti. 

South Lungpher bialtu MDC Pu C. Lalmuanthanga zawhna chhangin Education department (MS) EM Pu Andrew Laltlanzara chuan Sekulh MDC Constituency huam chhungah Samagra/LADC hnuaiah regular zirtirtu ten aikal an chhawr lo tih a sawi a, Sakeilui MDC Constituency huam chhungah Middle School bikah mi pakhatin aikal a chhawr tih a sawi a, hengah hian bialtu MDC ten inrawlhna an nei lo, a ti. Pu C. Lalmuanthanga zawh belhna, Samagra hnuaia zirtirtu kal tha duh lo te hi LADC hian a hriatpui em? tih chu Pu Andrew Laltlanzara chuan "Samagra hi tun dinhmunah District Council hnuaiah a awm tawh lova, helai bialah hian aikal chhawr an tam hle a, keini thuneihna a nih loh avangin hmalak ngaihna a awm lo khawp mai a, hemi chungchang hian thuneitu te nena inbiak a, hmalak zel tum a ni" a ti a. Aikal chungchang hi thuneitute hnenah vawi tam tak thlen a ni tawh, a ti bawk.

AOC bialtu MDC Pu LR. Dingliana Chinzah zawhna chhangin LAD changtu EM Pu C. Rongura chuan Lawgtlai Master Plan chungchangah hmalakna thar a awm loh thu a sawi. Zawhna neitu Pu LR. Dingliana Chinzah chuan Lawngtlai Master Plan hi nikum financial year chhung 2022-2023 chunga pass niin, budget-ah cheng nuai 5 dah a nih thu a sawi a, "tunah hian financial year thar 2023-2024 kan chuangkai leh ta a, kum khat chhungah hmalakna a awm ta miah lo hi kan vei tawk lo hle nii a lang" a ti. Pu C. Rongura chuan kuminah cheng nuai 5 dah belh a nih thu leh Master Plan chu thil awlai a nih loh thu leh kum 10/20 hmathlir chunga tih a ngai a ni a, Consultancy firm pawh pali vel chu biak tawh a ni a, UD&PA pawh an dawr tawh thu te leh hma an lak zel tur thute a sawi.

Chandmary bialtu MDC Dr. Lorrain Lalpekliana zawhna chhangin Education department (MS) EM Pu Andrew Laltlanzara chuan LADC budget 2022-2023 a Incentive Cash Award for Student chu mi pali te hnenah Rs. 50,000 theuh pek an ni a ti a. Tin, Common Question Examination nei zawh taka top ten-a langte hnenah pek an ni, a ti bawk.

South Lungpher bialtu MDC Pu C. Lalmuanthanga zawhna chhangin LAD changtu EM Pu C. Rongura chuan LADC in mimal kutah Local Body Fund pek a nei lo tih a sawi a, VC te hnenah chauh pek thin a ni, a ti.

LADC Budget Session hi April 5, 2023, dar 10:30am ah chhunzawm leh a ni anga, zawhna leh chhanna bakah, Lai Autonomous District Council Budget 2023 - 2024 chu sawiho a pass tum a ni ang. 

Post a Comment

Powered by Blogger.