March 20, 2023 (Rauthla) : Vawiin khan Lawngtlai West bialtu MLA Pu C. Ngunlianchunga chuan Aizawl Press Club-ah thuthar lakhawmtute a kawm a, District Council & Minorty Affairs (DC&MA) minister thar Robert Romawia Royte chu he a hna hi chelh thei niin a lang lo a ti a, a chang dawn a nih chuan 17. 06. 2022-a Deed of Agreement DC&MA leh NECS ten an lo ziah tawh chu cancel tur a ni, a ti.

Pu C. Ngunlianchunga chuan March 16, 2023 khan DC&MA changtu minister R. Lalzirliana chuan Autonomous Dictric Council area-a NGO te nawrna leh ngenna a vangin a hna chanpual DC&MA chu Robert Romawia Royte pek a ni tih a lo hriat thu a sawi a, hei hian tunlaia tawngkam lar tak Thluaka sum lut an tih hi a ti chiang hle niin a sawi bawk.

Congress MLA chuan, "June 17, 2022 khan Deeed of Agreement DC&MA leh NECS te hian an ziak a ti a, NECS neitu hi Vanlalfelpuia Royte s/o Robert Romawia Royte a ni. Heta neitu hi DC&MA minister thar Robert Romawia Royte fapa nia hriat a ni," tiin, "Hei hian sawrkar kalphungah leh Representation of People's Act 1951 Sec 9(A) a kalh a ni. Chuvangin he Deed of Aggrement tal hi sawrkar hian a cancel tur a ni, a cancel dawn lo anih chuan he portfolio hi Pu Robert Romawia Royte hnenah hian pek tur a ni lo," a ti.

Pu C. Ngunlianchunga chuan, "Fate ngei firm leh DC&MA ten Deed of Agreement an ziah tawh hnua Pa ber leh Minister hna chanpual kan CM-in a han pe hian Thluaka sum lut an sawi fo hi an pahnih hian an nih mai hmel ka ti a, hnung thak inhiah tawnna a awm ngei niin a lang. ADC area mipuite hi MNF sawrkar hian engahmah a ngaih lo zia a ti chiang hle a ni," a ti.

Lawngtlai West bialtu MLA chuan DC&MA kaltlangin Lawngtlai District tan Cheng nuai 11376.39 PMJVK scheme hnuai atanga hmuh chu a lawmawm rualin, ADC mipui te tan thawh ve tur thawh tur awm lova 99% zet mimal firm kuta a lu chu lungchhiatthlak a tih thu a sawi bawk. 

Post a Comment

Powered by Blogger.