Champhai, the 13th March, 2023: Tunhnaia Champhai District chhunga dan zawm lova lo/huan hala ram tikangtu ni a puhte lakah Champhai District Level Fire Prevention Committee aiawhin Member Secretary Pu Lalduhthlana, DFO Champhai chuan vawiin khan Champhai Police Station-ah FIR a thehlut a, pawi khawihtute chhuichhuaka an chungah dan tlawhchhana hma la turin a thlen a ni.
FIR thehluh a nih chhan hrang hrang tarlan zingah huan/lo hal hmaa V/C te hriattir hmasak loh avanga Rule - 4 (4) of the Mizoram (Prevention & Control of Fire in the Village Ram) Rules, 2001 bawhchhiatna awm te, huan/lo hal atanga hmundanga kangmei a chhuah loh nana meilam phiah a ni lo emaw phiah ni si, mahse kangmei chhuak veng tura meilam sial a zau tawk lo tih finfiah a nih avang te, kangmei chhuakin ram zau tak tichhiain thing engemawzah a kanral avanga Mizoram Forest Act, Sec 31(1) bawhchhiat a nih avang te, khawtlang ti raltia a bul vel a In te tana hlauhthawnawm a thlen avang te, fimkhur lo taka lo/huan hal leh thuneitute tawiawm tha lo te chu FIR thehluh a nih chhan langsar zualte a ni.
Ram tihkanna hmun FIR a tarlante chu Ngur khaw hmun hluia March ni 6, 2023 a huan hal avanga a bulhnaia mimal huan tin 12.5 vela zau kang te, leipui hal avanga March ni 8, 2023 tlai dar 5 vela Kanan Veng thlanmual ram kang te, March ni 11, 2023 chawhma dar 10 vela Chhungte V/C ram chhunga Hnahthial sih chunga lo hal avanga kangmei chhuak leh hemi avanga ram tin 50 vel a zau kang te, March ni 13, 2023 chawhma dar 11:10 vela Tlangsam tuikhuah kawra huan hal avanga Tlangsam VC ram leh a ep chiah a awm Forest Department plantation-a kangmei chhuakte a ni a. Vawiina Tlangsam rama kangmei chhuak avang hian VC ram tin 10 hmun vel leh Forest Department plantation tin 7.5 hmun a kang tawh a; Forest Department ram hi Champhai District leh Mizoramin a mamawh em em, ram dang atanga dan lova ramsa lakluh mante dahna tur, 'Satellite Wildlife Rescue Centre of Aizawl Zoo at Champhai' siamna tura hmunhma rawt niin, hemi atan hian Central Sawrkar-ah pawh beiseiawm taka project proposal thehluh tawh a ni.
FIR hi kangmei ti chhuaktu a puh mi 6; Ngur khua 1, Kanan Veng 4 leh Tlangsam 1 te lakah thehluh a ni.
Tlangsam bakah hian Hmunhmeltha leh Zote ramahte vawiin hian kangmei a chhuak a. Hmunhmeltha leh Zote rama kangmei chhuakte erawh Fire Station Champhai leh tlawmngaia thawk chhuak ten an thelh mit thei a; Tlangsam ram chhunga kangmei chhuak hi Forest Department leh Tlangsam Branch YMA ten an la thelh mek zel a ni.
Post a Comment