Presbyterian Kohhran Hmeichhe inkhawmlian chuan, rampum huapin hmeichhiaten puan bih uar tura inzirtir leh Pathian biak inkhawm uar uar tura inzirtir an rel a. Heng bakah hian Nula, tlangval leh tleirawlte enkawlna kawngah ram pum huapa inzirtirna neihte, ruihhlo leh mipat hmeichhiatna hman sualna laka tu leh fate an fihlum theih nna ram pum huapa hmalakte an rel bawk a ni.
Kum 2022 Rampum Kohhran Hmeichhe Inchhiarnaah - Bial leh Kohhran mal zawmtu 216 an awm a, Kohhran leh Branch Church zat 976 an awm bawk. Chhungkua zawng zawng zat- 1,17,455 an awm a, Ni tin chhung inkhawm nei thei chhung kua 81,030(68.83%) awmin, Buhfaitham tham ziah chhungkua 1,16,012 (98.54%) an awm bawk. Kohhran Hmeichhe member 1,92,490 an awm a, Kohhran hmeichhe inkhawm la nei thei lo kohhran 55 an awm bawk a ni.
Central Kohhran Hmeichhia chuan kum 2022-23 chhung khan Sum hmuh zawng zawng belh khawm Rs.39,74,073 ani a, Inkhâwmpui Lian Budget 2023-2024 atan Rs.44,89,000 chu ruahman a ni bawk a ni.
Kristian chhungkua dinhmun tehna kum 2022 chhungin nitin chhung inkhawm nei thin 100% a nei thin N.Khawdungsei leh Phainuam Pastor bial te an ni a, chhungkua 100% ten buhfai tham an tham thin bawk.
Nakum 2024 Kohhran hmeichhe rorel Inkhawmna turin Dawrpui Kohhran Biak in ruat a ni a, ni 8-10 March, 2024 chhunga neih a ni ang. Kum 2025 Hmeichhe Inkhawmpui Lian neihna turin Thenzawl ruat niin ni 7-9 March, 2025 chhunga neih a ni dawn a ni. Kum 2026 Rorel Inkhawm neihna turin Champhai Vengthlang niin ni 6-8 March, 2026 chhunga neih tur a ni a, Kum 2027 lnkhawmpui Lian neihna turin N. Vanlaiphai niin ni 12-14 March, 2027 chhunga neih tur a ni bawk a ni.
Mizoram Presbyterian Kohhran, Zoram Hmeichhe Inkhawmpui Lian vawi 50 na, ni 10-12 March, 2023 Darlawna neih chu Pathianni zanah a tiak a ni.
Kohhran Hmeichhe Inkhawmpui Lian hi Pastor bial pahnih Darlawn Pastor bial leh Darlawn Venghlun Pastor bialten an in thlen tawm a. Darlawn GSA khelmualah pandal sak a ni.
Kohhran Hmeichhe Inkhawm Lian vawi 50 na thupui "Pathian nena len dun" Mika 6:8 tih chu Rev.VL Luaia Hranleh, Executive Secretary, i/c Kohhran hmeichhia chuan Pathianni chawhma leh chawhnu hunah a sawi a. Pathianni zan inkhawmpui tawp zanah Kohhran hmeichhe Chairman Sailuti chuan thu a sawi bawk a ni.
Pathiannni thlengin Kohhran hmeichhe inkhawmpui palai thleng tawh chhinchhiah danin 10077 an awm a, khawmpuinaa kalte hi Lirthei 823 hmangin an kala, Bus 237, Sumo 349, Car 131, Pickup 106 a ni. Pathianni chawhmaah inkhawm 13,019 awmin Pathian hnena thilpek lakhawm thawhlawm pawh Rs. 2,62,430.00 a ni.
Central Kohhran Hmeichhe hruaitu thar turte
Chairman - Pi Zothanpari (SEC thlan)
Vice Chairman - Dr. Lalthansangi Fanai
General Secretary - Pi H. Lalfakmawii (SEC ruat)
Asst. Secretary - Pi Lalmuanzuali
Treasurer - Pi Zothansiami
Fin. Secretary - Pi R. Lalrempuii
Post a Comment