Governor in Assam Rifles huaihawta Phawngpui Tlang lawn te a hmuak

March 14, 2023 (Rauthla) : Vawiin chawhnu khan Governor Hari Babu Kambhampati chuan 23 Sector Assam Rifles huaihawt a thalai 30, college hrang hranga adventure club member thlanchhuah telna Phawngpui Expedition a Phawngpui Tlang lawnchhuak te chu Raj Bhavan-ah a lo lawm a. Heng thalaite – hmeichhia 14, mipa 16 leh anmahni hruaitutu Assam Rifles Officer leh sipai ten en inkawmna an nei a ni.

Governor Hari Babu Kambhampati chuan Phawngpui Expedition a tel thalaite leh an hruaitute chu a thil tum hlawhtling taka an hlen theih avangin lawmawm a tih thu a sawi a. He Expedition hian thalaite leh Mizoram mipuite bengah Tourism leh Adventure Tourism huanga Mizoram in theihna sang tak a neih chungchang te ring takin sawi se a duh thu a sawi.

Phawngpui Expedition tia hming vuah hi March 10 khan Chief Secretary Dr Renu Sharma chuan a vai liam a, March 12 khan Phawngpui Tlang chhip an lawn chhuak a ni. He expedition hi G-20 huanga Assam Rifles in Program an buatsaih zinga pakhat a ni a. Adventure sports, responsible tourism, Mizoram vawnfai leh environment humhalh, ruihlo laka thalaite in lak fihlim, Mizorama tlang mawi tak tak te dimdawi tak leh a ramhmul te ti chhe lo leh a hmunhma te ti bawlhhlawh lo zawnga tlawhchhuah intihhmuh te inzirtirna atana huaihawt a ni.

Phawngpui Expedition Team-ah hian hruaitu atan Assam Rifles chuan Officer 3, JCO 4 leh Sipai 4 an ruat a. Vawiina Raj Bhavan an rawn luh hian Brig Girish Upadhyay, DIG, 23 sector AR leh a officer ten an rawn tawiawm a ni.