Mizoram election department-a Joint Chief Electoral Officer Pu David Liansanglura Pachuau hnen atanga thudawn danin Tripura state election commission-in Bru vote nei, Tripura electoral roll a an thun tawhte hming hi ERONet kaltlangin Mizoram electoral roll a lo paih ve tura ngenna an rawn thawn thin a. ERONet hmanga an rawn thawn hi a kal chak theih loh avangin Bru vote neite hming paih hi duh angin kalpui chak theih a ni lo. Tun thleng hian Bru vote nei 3,949 chu an hming paih turin Tripura in an rawn thawn tawh a, an hming hi paih vek a ni tawh a. Hei bakah hian Tripura a electoral roll-a an hming chuang tawh tih tihchianna form an rawn thawn hmangin Bru vote nei 390 te hming chu Mizoram electoral roll-ah paih a ni tawh a ni.
Kum 2018 Mizoram assembly inthlanpui-ah khan Tripura a pem thla tawh si Mizoram electoral roll a hming la chuang chu mi 11,658 an awm a. An hming hi paih chhoh zel a ni a. Kumin kum tawp lama Mizoram assembly inthlan hunah chuan Tripura a awm Bru vote neite hming hi paih zawh fel hman tum a nih thu dawn a ni.
Hetihlai hian Tripura state election commission lam chuan Tripura a inbengbel Bru 37,136 zinga mi 14,000 vel chuan Ningani a Tripura assembly inthlanpui-ah vote an thlak thei dawn niin an sawi a. Tun dinhmunah hian Tripura a inbengbel Bru ho zinga 21,703 te chu vote nei thei tura ngaih an ni a, electoral roll-a thun chhoh mek an nih thu an sawi a ni.
Kum 1997 October ni 21 a Dampa Tiger Reserve huamchhunga Bru hel pawl mite'n ramsa humhalh hna thawktu Pu Lalzawmliana an kahhlum hnu lawk khan Bru tam tak chu Tripura lamah a hlawpin an pem thla a. Kum 1998 Mizoram assembly inthlanpui a vote la neite kha Election Commission of India-in an hming paih a remtih loh avangin Mizoram inthlan a awm apiangin vote an thlak theih dan tur dap a ni a. Hemi avang hian tlawmngai pawl leh zirlai pawlte chuan Election Commission thiltih dan hi an do reng a. A changin ballot paper hmangin Tripura chhunga an awmna relief camp atangin vote an thlak a, a changin Mizoram chhungah lo lutin vote an thlak bawk thin.
Hetianga a kal chhoh reng lai hian January ni 16, 2020 khan sorkar laipui, Mizoram leh Tripura sorkar leh Bru pawl hrang hrang hruaitute'n Delhi-ah inremna an siam ta a. Vawi tam tak Mizoram lama kir tura ruahmanna siam a nih hnu pawha kir duh lote chu Tripura a an inbenbel phalsak an ni ta a. Inbengbelte chu Tripura electoral roll-a thun zel tura tih a ni ta bawk a. Hemi hnu hian Mizorama vote nei Bru-te hi Tripura lam chuan electoral roll-ah thunin, an thun tih an rawn hriattir apiang chu Mizoram elction department-in an hming an lo paih ve ta zel a ni.
Post a Comment