Aizawl Feb,21.2023 : Pachhunga University College chuan vawiin (February 21, 2023) hian an college Lecture Hall-ah Pianpui Tawng Ni (International Mother Languge Day) an hmang.

He hun hi Dr. Lalnunpuia Renthlei, Asst. Professor chuan a kaihruai a. Remlalthlamuanpuia, Asst. Professor chuan Pianpui Tawng ni thupui a sawi a. Tawng chu hnam nihna (identity) kengtu a ni a, hnam nunphung (culture) nen a inzawm thu sawiin, "Mizo tawng chu Mizo hnam nihna pawimawh tak a ni," a ti.

Kumina Pianpui tawng ni thupui 'Multilingual education - A nescessity to transform education' tih chu sawifiahin, khawvel hnam tin, tawng hrang neite hian anmahni Tawnga zirna dawn chu an dikna chanvo a nih thu a sawi tel bawk.

Hemi hnu hian Dr. H. Laldinmawia, Head, Department of Mizo pawhin thu sawiin, Mizo Tawng chu Mizote ta a ni a, mahse mi zawng zawng tan a ni tih sawiin, "Mizo Tawng hi a neituten kan humhalh a, a hman dik pawh kan zir zel a tul a, chutih rualin mi tam zawkin an hman zel theihnan kan tanrual zel a tul a ni," a ti bawk. Pianpui tawng ni hmanaah hian BA leh MA Mizo zirlaite leh zirtirtute an tel a ni.

Post a Comment

Powered by Blogger.