MZU Southern Campus dinna tur DPR Approval chu sorkar laipui atangin dawn ala ni lo

 Aizawl Feb 23, 2023: Higher & Technical Education Minister Dr. R. Lalthangliana chuan vawiin Assembly thutkhawmah Aizawl South I bialtu MLA Pu C Lalsawivunga zawhna chhangin MZU Southern Campus-ah class tan ala nih loh chhan chu Southern Campus a taka kalpuina tur DPR pawmpuina hmuh ala nih loh vang a nih thu house a hrilh.

Lunglei Engineering College Lunglei chu peihfel ala nih loh thu leh MZU Southern Campus dinna tur DPR Approval chu sorkar laipui atangin dawn ala nih loh thu House a hrilh bawk a ni.

Zawhbelhna chhangin Minister Dr. R. Lalthangliana chuan Southern Campus Lunglei chu Mizoram sorkar ni loin sorkar laipui leh MZU kut a nih thu a sawi a. A taka kalpui turin post siam angaih thu leh hemi atan hian MZU-in proposal an siam chu sorkar laipuiah thawn thlak a nih thu a sawi bakah HRD Minister-in an peihfel har avangin class tan har a nih thu House a hrilh a ni.

Mamit Bialtu MLA Er. H Lalzirliana zawhbelhna chhangin NIT Lengpui-a mi chu Forest Clearance dilna nghah mek a nih thu a sawi bawk a ni.

Serchhip bialtu MLA Pu Lalduhoma zawhna chhangin Higher & Technical Education Minister chuan MZU Southern Campus din a nih theihnan kum 2013 November thla khan MHRD-ah dilna thehluh a nih thu house a hrilh a, Campus dinna tur hian a thuphungin ni 17, january, 2020 khan phalna a pe tawh tih a sawi.