Aizawl 07.02.2023 : Mizo National Youth Front(MNYF) Headquarters’ Office Bearers leh Aizawl khawpui chhung a MNYF Block sawm leh pathum (13) hruaitute chu vawiin ni 7,February 2023 hian MNYF Headquarters office-ah thu pawimawh hrang hrang ngaihtuahin an thukhawm.

    He hunah hian Pu Vanlalzawma MNF Vice President chuan, “MNF hi a din tirh atangin ṭhalaite din a ni a, Pu Laldenga’n MNF a din khan kum 34 mi chauh a ni. Remna ziah dawna Delhi a kal dawn pawh khan a hmatheh ber chu ṭhalaite tho a ni. MNF nungphung hi ṭhalaite a ni a, kumin kumtawp inthlan pawh hi ṭhalaite kutah a awm a ni”, a ti.
    MNF Vice President Pu Vanlalzawma chuan, “Political party dangin MNF inrelbawlna ang hi an nei ve lova, keini chuan hnam thinlung pu in ram kan kaihruai a ni. MNF innghahna hi India Nationalism a ni lova, Mizo Nationalism a ni. Kan danglamna bik hi thalaiten an hriatthar zel a tul a, MNF hi Mizote innghahna lungphum a nih zel theih nan thalaiten nasa zawka ke kan pen a tul a ni”, a ti bawk.
    He huna thusawitu dang MNF Thalai Vice President Zodinpuia chuan, “Hripui leng avangin ni 718 chhung zet Mizoram ah Lockdown chi hrang hrang neih a ni a, hripui leng avanga sawrkarin sum leh pai a harsatna a neih hi chhuanlam a ni lova, thil thleng diktak a ni, a ti. Sawrkarin sum leh pai enkawlna kawngah inrenchemna (austerity measures) nasa takin a kalpui a, RBI in statement a tihchhuah thar berah phei chuan Mizoram chu India ram State 29 zingah sumfai a leiba nei tlem ber pahnihna kan ni”, a ti bawk.
    MNYF Vice President Pu Zodinpuia chuan, GSDP atanga tehin Mizoram hian leiba a lo nei tam deuh anih pawhin India ram State dang chu Mizoram in State a neih hma kum tamtak chhung inrelbawlna nghet tak lo nei tawhte an ni a, India ram State dangte GSDP tisangtu ber pakhat chu Industrial sector-a ni. Mizoram ah chuan hnamdangte an duh ang anga an rawn luh theihlohna tur leh sumdawnna an rawn kalpui theihlohna turin Inner Line Regulation hman a ni a. Kan ram leh hnam himna tur anih chuan kan GSDP lo hniam deuh mahse keini chuan kan hnam himna kan dah pawimawh hmasa zawk tur a ni, a ti.
    Kan GSDP sang taka awm a kan hnam chimral nge kan duh, dinhmun chhe deuh zawka awm chung pawha kan hnam humhim tih pawh hi kan inzawh nawn fo a tul a ni, a ti bawk.
    Aizawl khawpui chhungah hian MNYF Block 13 awmin Unit 178 a awm mek a. Vawiin a MNYF hruaitute thukhawm chuan Mizoram in inthlanpui a hmachhawn leh turah Pu Zoramthanga kaihhruai MNF in sawrkar na a chan leh ngei theih nan thalaite’n chak lehzuala ke an pen theihna tur ruahmanna chi hrang hrang an duang a ni.

Post a Comment

Powered by Blogger.