February 10, 2023 (Rauthla) : School Education Minister Pu Lalchhandama Ralte chuan Mizoram Institute of Comprehensive Education (MICE) School, Tuikual South a mi chu a nihna ang (drawing) ang thlapa sak a nih thu a sawi a, ruahmanna lian zawk leh sang zawk kal zel tur a ni, a ti bawk.

Nimin khan ZPM Thalaite chuan helai hmun hi an tlawh a, a sak danah thil dik lo tam tak an hmu chhuak tih an sawi a. An thil hmuh chhuah nia an sawi thenkhat te chu, laboratory room a bo tihte, chhawng hnuai bera room tih pum a ni lo tihte, retaining wall pawh hi a awm zat tur a awm kim lo tihte, ruah sur huna tui hawk luanna tur leh tui chhe luanna tur hrim hrim tui luankawr engmah hmuh tur a awm lo tihte, School building chung berah hian railing (tl√Ęk dal / vawn ban) siam vek tur nia ngaih a nih laiin, railing hi hmun tam zawkah siam a ni lo tihte, floor tinah naupang ten zunram thiarna an nei tur nia a lan laiin third floor-ah chiah toilet hi siam a ni tihte, He sikul sakah hian rikrum thila chhuahna tur 'emergency exit' pawh siam a ni lo tihte a ni.

Hemi chungchang hi vawiin Assembly session-ah sawiin Minister chuan "MICE School chungchangah hian a bilhah an tho lo deuhin ka hria a, he school sak hna hi sorkar hmasa hunlai 2016-17 chhoa NEDP suma sak tura a lo dah tawh a ni a, school sak hnathawktute hi chi thum an awm a, sorkar hmasa pek te, kan sorkar pek te leh Samagra atang tein a ni. Hetiang tehnuai a nih avang hian a buarchuar deuh lai chu a awm lo thei lo. Sak a nih takah chuan a drawing kan han hmuh pawhin 'hei hi ti zawk hian kal se' tih hi kan nei ve thova. Nimina ZPM Thalaiin an enfiah a awm tura an ngaih awm lo an tihte kha a drawing-ah a awm lova, a drawing ang thlapin he building hi an sa a, engkim mai hi a drawing nen enmil nise a tha hle" a ti.

Minister chuan, "ZPM Thalaiin an sawi thenkhat ngaimawhawm zualte chu keini pawhin tun hma deuh khan a ngaihtuah dan tur kan lo sawiho tawh a, Ruahmanna lian zawk leh sang zawk kal zel tur a ni a, a tum tak tak a la thleng lova, sum chi thum pawh khawma kal leh thawktu chi thum an awm avangin duhthusamin a la fuh tawk lo mai a ni" a ti bawk. 

Post a Comment

Powered by Blogger.