Lawngtlai, February 28, 2023 : February 6, 2023 chhun dar 12 vela Melthum Silaimual piah, KS Thanga Chawlbuk thlen hma, kawngsir chawlhbuk atanga hla lo te, kawng thlanga hmeichhe ruang chhe tawh tak chhar chu a chhungte'n (a nuṭa ngeiin) Zahleipari (Kum 28) ngei a ni an tih avangin February 9, 2023 khan Lawngtlai Vengpui thlanmualah vuiliam a ni. Vawiin, February 28, 2023 khan he hmeichhia thia chhar hi Village Council & YLA Lawngtlai Vengpui Branch te chuan Zahleipari a ni lo tih an hre chhuak a. Zahleipari (Parteii) hi TBCC Home, Sakawrtuichhunah dam takin tunah a awm mêk a ni, an ti.

Village Council & YLA Lawngtlai Vengpui Branch te chuan Parteii ruang ni a ngaih phum tâk chungchang hi Police-ah pawh hriattir tawh a ni a, an ti a. Lawngtlai Vengpui thlanmuala phum a nihna hmunah hian ruang hi dah a ni rih dâwn a. Amah hretu emaw a chhungte an awm a nih chuan ruang hi phawrh leh theih a ni ang. Amaherawhchu ngaihventu an awm lo a nih chuan Lawngtlai Vengpui thlanmualah hian a ruang hi dah hlen a ni ang a, Branch YLA in a thlan hi a enkawl chhunzawm ang, tiin vawiin khan thuchhuah an siam.

Zahleipari leh a nuta te hi Lawngtlai Vengpui mi leh sa an ni a, a nuta hi tunah hian Aizawlah lamah a cheng mek a ni.

Post a Comment

Powered by Blogger.