Lawngtlai, February 27, 2023 : Lai Students’ Association, General Headquarters : Lawngtlai chuan Pu R. Lalzirliana, Minister, District Council & Minority Affairs Department chu Assembly House-a a thu sawi chungchangah ngaihdam dil turin an phut.
Hemi chungchanga vawiina thuchhuah an siamah, Mizoram Legislative Assembly Budget Session 2023-2024 neih mekah Tahrik ni 23rd February, 2023 a Pu R. Lalzirliana, Minister, District Council & Minority Affairs Department changtuin 125th Indian Constitutional Amendment (Sixth Schedule) chungchangah Parliamentary Standing Committee-in Mizoram sawrkar a rawn angin Mizoram sawrkarin Comments a pek chungchangah engkim hre vek leh “Congress hunlai khan saw lamah khan vote zawn nan lem kan va der ve mai mai a nih kha, an lo awi ve em em lehnghal a, a ho tak tak ania,” tia sawiin ADC area mipuite hmusit leh tham lo taka thu a sawi ta mai hi keini Lai Students’ Association chuan a pawi kan ti tak zet a ni, an ti. LSA chuan Pu R. Lalzirliana hian Guwahati hmuna Meeting-ah pawh a tel ve angin a insawi tih an sawi a, he meeting-ah hian LSA chuan LADC aiawhin sawm tel ve an ni tih sawiin, "keini LSA te pawh kan tel ve a, kan Minister hi a tel ve awm kan hre lo a ni" an ti.
LSA chuan Pu R. Lalzirliana, Minister, District Council & Minority Affairs Department changtu hian a department enkawl hi a hre chiang lo hle a ni, an ti a. "Assembly House zahawm taka dawt a sawi ta mai hi a pawi kan tiin kan dem tak zet a ni. Keini ADC area mipuite zah lo tak leh hmusit taka Assembly House meuh a a thusawi chungchangah hian ngaihdam dilna emaw thupha chawina emaw Assembly House ngeiah nei/siam turin kan phut tlat a ni" an ti.
An duhnate hi a tih hlawhtlinsak thei lo a nih chuan LSA chuan Pu R. Lalzirliana hi sawrkar thilah emaw Election Campaign emaw eng thilah pawh Lawngtlai District leilung lo rap tawh lo turin an ngen nghal bawk a ni.
Post a Comment