Lawngtlai 15.02.2023 : Nimin khan Lawngtlai College Veng-ah District Basketball Court leh Table Tennis Hall hawn a ni.
Table Tennis Hall hi Pu C.Hrangthianga EM SYS Department LADC chuan hawngin, Basketball Court hi Pi Marilyn Rualzakhumthangi,MCS Project Director, DRDA Lawngtlai District chuan a hawng bawk.
Pu C.Hrangthianga EM chuan thusawiin, Chief Minister Pu Zoramthanga kaihhruai sorkar chuan, Sports lama hma kan sawn theih nan kawng hrang hrangin hma a la mek zela, Lawngtlai District chhungah ngei pawh hmalakna tam tak kan hmu mek zel a, Basketball Court pawh hi hmun hnih-ah min buatsaih sak leh dawn a ni, a ti a. Table Tennis khel thin thalaite pawhin theihtawp inchhuah zel ka beisei a ni, a ti bawk. Ruihhlo a vanga thalai tam tak an buai laia, thalai fel leh tangkai tak tak infiamna lama tui tam tak inla awm hi a lawmawm hle a, tunah chuan hlawh neiin mi tam takin Mizoram chhungah ngei pawh an khel ve ta. Chuvangin, keini ho pawh hian infiamna hi eizawnna tling a ni tih kan hriat ah ngawt duh tawk lova, eizawnna tling anihna chuan kan hmuh theihna turin theihtawp kan chhuah a hun tawh tak zet a ni, tiin infiammite a fuih bawk a ni.
Pi Rualzakhumthangi MCS Project Director DRDA pawhin Basketball Court a hawn zawh-ah thusawiin, College veng chhunga hetiang infiamna hmun tur buatsaih fel a lo ni ta hi alawmawm hle a, Department te nen pawh thawhhona tha tak kan nei thin hi a lawmawm tak zet a ni, a ti. Tunah thalaite infiamna tur court tha tak mai kan hawng a, hei hi duh tawk mai lo ila, a neitu rilru pu a, uluk taka enkawla dim thiam tur leh enkawlpui chhunzawm hi kan tih tur ani tih hria a, hei hi veng chhung mite chauh ni lo, infiammite tan hmasawnna nasa tak min pek ngei pawh a beisei awm tak zet a ni, a ti bawk.
Post a Comment