Saitual February 20.2023 : Vawiin hian Saitual District Village Council Association chuan, Saitual District a pian hnua a vawikhat nan Kaphranga Hall, Rulchawmah Assembly-an nei a. HRD Board Vice Chairman, Dr. L.Thangmawia, Lengteng bialtu MLA chuan khuallian niin a hmanpui a, Pu VL Hruaizela Khiangte, Saitual DC chu khualzahawm a ni.
Dr. L.Thangmawia chuan, Mizoramah hian kum 1954 hmalam zawng kha chuan Mizo Lalte kutah khawtlang enkawlna awmin, LAL ban a nih hnuah khawtlang enkawlna chu khawtinin kan thlanchhuah Village Council-te kutah a lo awm ta a. Kan LAL te khan neitu thinlung tak tak pu in an khua te an enkawl thin a, an fakawm hle a ni. Kum 1954 hnu lama VC te kuta thuneihna dah a nih hnu hian kan LAL ten an khawtlang tana an rilru put thin dan hi VC member ten kan pu pha zel em? tih hi VC member zahawm tak takte ka zawt duh che u a ni, a ti.
Kum 2008-a Pu Zoramthanga kaihhruai MNF sorkarin Saitual, Khawzawl leh Hnahthial District-a a lo puan tawh chu kum 10 lai hlamchhiahin a lo awm a, District a puangtute rilru pawh a na hman hle a. Mahse vanneihthlak takin, Pu Zoramthanga kaihhruai MNF sorkar bawk chu Pathian leh mipuite zarah kum 2018 kum tawpah a lo piang leh ta a. Sorkar thar chuan kum 10 kalta a district a lo puan tawh 3-te chu tuaihnum nghalin, Covid hripui lenlai pawhin heng district ti puitling turin hma a la char char a, tunah chuan DC dah fel vek a ni tawh a. A tahtawlin district office hrang hrang te dah chhoh zel an ni a. Saitual district bikah hian Department 8 te chu District office-ah upgrade ni tawhin, department thar 5 hawn thar a ni tawh bawk. A vaiin district thar 3 ah hian department 13 district office-ah upgrade tawh niin, department 27 hawn thar a ni tawh a. Hetiang taka hripui leng kara kan district tharte ngai pawimawhtu Pu Zoramthanga kaihhruai MNF sorkar chungah lawmthu sawina tur a tam hle tawh a ni, a ti.
Dr.L.Thangmawia chuan, Covid hripui len laia VC te hahzia ataka hmutu ka ni a, khawtlang mipuite nen an tanrualna azarah Mizoram khaw tin te hi India rama hripui do kawnga thawk tha ber kan nih ka ring a ni, a ti a. Covid hripui leng avangin kum hnih chuang lai nunphung a mumal lo va, khaw hrang hrangin in tawrh ang thovin state sorkar pawhin kawng hrang hrangin a tuar a, kan Chief Minister Pu Zoramthanga kaihhruaina hnuaiah sorkar pawhin he kan hripui lengin hliam nasa tak min hnutchhiah hi tidam leh turin theihtawp a chhuah mek zel a, kan tanrual phawt chuan Pathian malsawmna zarah he hripui hliam hi kum hnih khat chhungin kan tidam ngei ang a, lei rem rapin kan ram hian hmasawnna lamtluang nasa zawkin a zawh chhunzawm zel dawn a ni. Sorkar hmalakna zawng zawng deuhthaw ah VC te hi sorkar kut ke in ni a, in tel lo va sorkarin hna pawh a thawh theih loh tam tak a awm a. Chungah chuan rinawm leh dik taka in mawhphurhna Zoram mipuite tana hlenchhuak zel turin VC member-te ka ngen che u a ni, Dr.L.Thangmawia a ti bawk.
Post a Comment