Champhai, the 1st February, 2023: Ni hnih cham tura Champhai tlawha thang mek Mizoram Governor Pu Hari Babu Kambhampati chuan vawiin chawhnu khan Champhai Winery, Tlangsam tlawhin an hmalaknate a enfiah a; Champhal Grape Growers Society leh Hnahlan Grape Growers and Processing Co-operative Society Limited hotute a kawm bawk. Hemi hnu hian Pradhan Mantri Ujjwala Yojana (PMUY) leh Pradhan Mantri Awas Yojana - Housing for All (Urban) hnuaia hamthatna dawngtute tlawhin a kawm a ni. Governor hi Environment, Forest & Climate Change Minister Pu T.J. Lalnuntluanga, Champhai South bialtu MLA ni bawk bakah DC Champhai Pu James Lalrinchhana, SP Pu Lalrinpuia Varte leh Official dangten an tawiawm a ni.
Governor Pu Hari Babu Kambhampati chuan Champhai Winery tlawh theia a awm chu lawmawm a tih thu sawiin, an hmalaknate engemawchen a lo hriat tawh thu a sawi a. Champhai District-a Winery pahnih lai a awm leh loneitute intelkhawmin an kalpui chu ropui a tih thu a sawi a. Grape chingtuten harsatna an tawh chu pawi a tih thu sawiin, Sawrkarin dan thar siama hma a la chu lawmawm a ti a. Wine siam chu food processing hnuaia a awm anih thu sawiin, agriculture product-te cheibawla siam danglam value addition chu hmalakna pawimawh tak a ni, a ti a. Tun aia nasaa huang zauh leh changtlung zawka kal tura Ministry of Food Processing Industries kaltlanga hmalakna an nei chu lawmawm a tih thu a sawi bawk. Governor chuan Grape chauh nilo thei dang sawr leh um theihte pawh ngaihvena huang zauh a tul thu a sawi a. An hmalak lehzelna turah duhsakna a hlan a, Mizoram mai nilo India rama loneitute tana entawntlak leh tihhmuhtu nih tum turin a chah a ni.
Environment, Forest & Climate Change Minister Pu T.J. Lalnuntluanga chuan Champhai District chhunga loneitute hmalakna pawimawh tak grape sawngbawlna hmunhma Governor-in a hun hlu tak senga a tlawh chu lawmawm a ti a. Hun harsa tak paltlanga dan anga grape zawrhna tur dan thar Sawrkarin a siam thu sawiin, grape chingtuten hmabak eng tak an neih thu sawiin duhsakna a hlan a. Tun aia nasa zawka hma la a, ram ngaw humhalh nan kum tina lovah thin bansana lo nghet nei thei tura ngaihtuahna seng turin a chah a. Tun atanga reiloteah Sapthei sawngbawlna turte pawh buaipui tum anih thu sawiin, harsatna an neihte a hnena thlen hrehlo turin a chah a ni.
Mizoram hi North East India-a grape thar awm chhun leh India rama grape thar tam 5-na niin, Champhai leh Hnahlan-ah Winery a awm a. CGGS enkawl Champhai Winery hian kum 14 hmel a hmu tawh a, an Grape sawngbawl hi Bangalore Blue variety niin, vawiin thlengin Grape quintal ,15,218 an lei tling tawh a, hemi atan hian Rs 5,78,41,160/- (cheng vaibelchhe nga maktaduai sarih nuai riat singli sangkhat za leh sawmruk) an seng tawh a ni. Kum 2010 atang khan Grape quintal 918 leiin bul an tan a, kum kalta khan quintal 1144.98 an lei tling a, an Grape lakte hi herin a umna zemah an um mek a ni.
Kum 2007 khan Champhai Grape Growers Association (CGGA) tih thin chu Winery din anih dawn avangin Champhai Grape Growers Society (CGGS) ti a thlak niin, Firms & Society-ah an inziahlut a ni. MIP sum cheng nuai 83 (loan) hmanga bultan niin, he loan hi November ni 9, 2020 khan Sawrkar chuan rulh let ngai lo turin grant-ah a leh sak a ni.
Champhai Grape Growers Society-ah hian Governing Board Member 15 awmin kum 2 danah inthlan thin a ni a. Tun dinhmunah hian Champhai Grape Growers Society-ah hian Grape chingtu member 134 awm mekin, Staff leh Worker mi 30, Executive Member 9 leh Office Bearer 6 an awm mek bawk a. Champhai Grape Growers Society hnuaiah hian Branch 9 awm mekin mumal taka inenkawlna kalpui thin a ni.
CGGS hian Ministry of Food Processing Industries (MOFPI) kaltlangin project an kalpui mek a. DC Office kaltlangin Pradhan Mantri Jan Vikas Karyakram (PMJVK) hnuaiah Commerce & Industries Department hnuaiah project dil mek a ni bawk a. Dan thar hnuaiah Winery License an nei fel tawh a, State pawn thlenga hralhchhuak thei turin hmachhawp an nei a ni.
Champhai Winery a tlawh zawh hian Governor chuan BPL family-te tana a thlawna eirawngbawlna gas connection pekna scheme, Pradhan Mantri Ujjwala Yojana (PMUY) kaltlanga hamthatna dawngtu leh khawpuia cheng insak tanpuina scheme, Pradhan Mantri Awas Yojana - Housing for All (Urban) dawngtu Tlangsam ami te a tlawh a; scheme awmzia leh tangkainate a sawifiah a, an hmuh dan leh chhawr tangkai dante a zawt nghal bawk.
Post a Comment