Chief Minister leh NDMA hotu inkawm

 Aizawl, 01.02.2023: Chief Minister Pu Zoramthanga chu vawiin tlai khan a pisaah Lt. Gen. Dyed Ata Hasnain (Retd.), Member, National Disaster Management Authority leh Brig. BS Thakar (Retd.), Consultant Grade-II, (ME&IRS), NDMA chuan an hmu a, DM&R Secretary Pi K. Lalrinzuali'n a tawiawm a ni.

Naktuk (2.2.2023) hian district tinah chhiatrupna lian tham lo thlen thulha felfai zawka chetlakdan enchhinna “Mega Mock Drill” neih a ni dawn a. Mizoram chu a leilung a la naupan avangin chhiatrupna hrang hrang nghawng lian tham tak tawk thei a nih avangin an ngaihpawimawh thu te sawiin, Mega Mock Drill pawh chu urhsun taka lak tha an tih thu te an sawi a.

Khawtlangah a tul huna inpumkhat taka puih ngai te puih duhna rilru pu Mizote zingah an awm chu fakawm an tih thu sawiin, disaster management atana pawimawh tak pakhat "community participation" chu inzirtir chawp ngai lova Mizote nunphunga bet tlat a nihzia leh fakawm a tih thu te sawi a ni.

Ruahman lawk dan chuan naktuk February ni 2, 2023 (Ningani) hian Mizoram District headquarters zawng zawngah lirnghing lo thlen thulha felfai zawka chetlak dan enchhinna “Mock Drill” neih tur a ni a. Aizawl khawpui bikah chuan hmun hrang hrang 6 ah Mock drill hi neih a ni dawn a, a tan tirh chawhma dar 10:00 ah Aizawl bawrhsap pisa atang ralkhel dar (siren) tihrik a nih dawn avangin mipuite chi-ai lo turin DM&R department chuan ngenna a siam a ni.