Borussia Monchengladbach star forward Marcus Thuram chuan Chelsea leh Inter nena sawizawm a nih hnuin tun season tawpah hian tuna a khelh mekna hi free transfer-a chhuahsan a tum.

Gladbach sporting director Roland Virkus pawhin he an France international hi June thla tawpa a contract a zwwh tawh dawn avangin an chân ngei a rin thu a sawi ve bawk. Europe club lian hrang hrang te'n Thuram hi lak luh an duh a, chung zingah chuan Inter hian la lut thei tura hma an hruai a, lak luh tum ve club lian dang pahnihte chu Chelsea leh Bundesliga-a Gladbach elpui Bayern Munich te an nih thu report chuan a tarlang.

Kum 25 a upa Thuram hian tun season ah Bundesliga goal 11 leh assist vawi 3 a nei tawh a, German league sang berah hian ani aia goal-a inrawlh hnem hi player panga chiah an awm. Gladbach sporting director Virkus chuan Sport1 in an kawmnaah France player ropui ni thin Lilian Thuram-a fapa hi chelh an duh thu sawiin, "Marcus Thuram a tel hi chuan kan famkim thin. Mahse club lian zawka khelhna hun tha a nei a nih chuan kan kaltir mai pawh a ngai ang.

"Nimahsela, player reng reng free transfer-a an chhuak tur hi chu thil tha lam a ni loa, ani ah ngat phei chuan hriatthiam a har leh zual," tiin a sawi.

Gladbach te hi Bundesliga ah pariatna an ni mek a, Inrinni khan player 10-a khel Bayern lakah 3-2 a chakin, Thuram hian Gladbach chakna goal hi a thun nghe nghe a ni.


Post a Comment

Powered by Blogger.