Central-ah Congress sorkar lo mah se Mizoramah kan sorkar thei - Pu Lalsawta, President MPCC

 MPCC/Media/PR-2023/13

Dated: Aizawl the 3rd February, 2023

     PRESS RELEASE

              February ni 3, 2023 (Zirtawpni) hian Congress Bhavan Golden Hall-ah Friday Political Session neih a ni a. Pu Lalsawta, President MPCC leh Pu PC Lalthanliana, GS MPCC te'n thu an sawi a ni.

                Pu Lalsawta chuan, Party mipuite fuihin, "Central-ah Congress sorkar lo mah se Mizoramah kan sorkar thei. Central-a kan sorkar loh laiin Rajasthan leh Himachal Pradesh-ahte kan sorkar tho. Arvind Kejriwal pawh Central a sorkar miah lovin Delhi UT-ah a sorkar thei a, Mizo Union te, PC te, MNF-te pawh Central a sorkar miah lovin rei tak Mizoramah an sorkar thei. Central-ah ZPM sawi tur pakhat mah an awm lo, mahse Mizoramah sorkar an tum ve tho. Chuvangin, Central a kan sorkar loh avanga Mizoram kan sorkar theih lohna chhan tur pakhatmah a awm lo," a ti.

          Pu Lalsawta chuan, "Sorkar loh lai hi sorkar huna kan zia tur lantir hun a ni. Party thenkhat chuan anmahni thunun tura an dinte thu an awih duh lo a, 'kan sorkar huna kan tih tur alawm kan sawi' tiin sawi mam an tum. Mahse, sorkar hma pawha thunun theih lohte hi sorkar hnuah tuman an thunun lo ang. Kan sorkar huna kan awm dan tur ang tak hian tun hunah hian kan awm tur a ni," a ti.

                "Sum hmachhuana MLA election hmachhawn tum an awm laiin, Congress Party hian sum seng tlem chunga Sorkar hi a theih a ni tih kan hria a, Pathian rinchhanin kan inbuatsaih a ni. Chuvangin, Mizoram hmun tina Congress Party hotute pawhin inthlan kaihhnawiha sum kan sen tam loh nan vawiin atangin i thawk tan ang u. Candidate-te phur rit siamsak lo zawngin Campaign i bei ang u. Mi thenkhatten an sum ngah ringa tlin an tum hi mipuiin kan hnawl chhan a ni zawk dawn. Hawh u, sum hmachhuana politics khelte hi che thei miah lovin i siam ang u. MNF sorkarna hnuaiah hian Krismas kan hmang tawh dawn lo. Hmalam i thlir tawh zawk ang u," a ti.

                Pu Lalsawta chuan, "Sorkar hnathawkte tha taka enkawl leh mipui tana tangkai lehzual tura remruat hi thil tih theih a ni. Provisional Employees-te dinhmun turte pawh hi uluk leh fimkhur taka ngaihtuah a ni ang a, tuna an dinhmun aia ṭha zawka kalpui dan kan ngaihtuah dawn a ni," a ti bawk.

                Pu PC Lalthanliana, Gen. Secretary MPCC chuan MNF inrintawk lohzia sawiin, "Mipuiin an rin tawh loh chu thu hran, anmahni leh anmahni pawh an inring zo tawh lo a. Party mala sorkarna siam an awm ring si lovin, Coalition Government a awm a nih chuan Congress Party tel tur thu an sawi nasa a ni," a ti a. ZPM pawh hian Party mala sorkarna an siam loh tûr thu sawiin, Pu Lalduhoma, an CM Candidate ber pawh hian bial hniha a din loh chuan a ngaih a ngam a rin loh thu leh Serchhip bialah chuan a tlin zawh a rinawm tawh lo a ni, a ti bawk.

                He hun hi Pu James Thanghmingmawia, Secretary MPCC in kaihruaiin, Pu Jerome Bawlte, GS NSUI, Tv. David Zochhuanmawia, MPCC Media Deptt. leh Pu K. Lalfakzuala, Aizawl E-II Block te'n report an pe bawk a ni.

Sd/-

(DAVID ZOCHHUANMAWIA)

MPCC Media Department