Brighton laka si thum faia an tlawm hnuah Liverpool manager Jurgen Klopp chuan a bul atanga an tan that leh a ngaih thu a sawi.
Liverpool hi tun season Premier League-ah vawi 6 an chak lohna a ni ta a, table-ah 9-naah awmin, point 10 laiin top 4 an pha tawh lo a ni. Amex Stadium-a an khelh dan defensive lutuk khan lu a ti hai a, Brighton chuan ball posessions 62% an nei a, game an thunun kan ti thei awm e. Tin, Allison-a goal venah vawi 16 Brighton khan an shot.
"Hei hi football buaina a ni a, football-a chin fel ngai a ni. Tha takin khel ila Brighton nena kan match kha harsa lutuk tur a ni lo. "Kan khelh that a ngai a, kan inven a ngai. Kan inven char char chuan khelmual hi a lang zau ngawih ngawih mai ni.
"Ngaihtuah tur tam tak kan nei. Senior striker remchang pahnih chiah kan nei a, chinfel dan kawng kan zawn thuai a ngai. Chu chu ni tina kan buaipui a ni rih," tiin Klopp chuan a sawi.
Tun season Premier League-ah Liverpool hi tluang lo hle mah se FA Cup fourth round inhlankai theihna hun remchang an la nei a, Champions League lamah pawh 2021-22 final-a hnehtu Real Madrid laka phuba lak theihna hun remchang an la nei bawk. Liverpool leh Real Madrid-te hi round of 16-ah an inhmachhawn dawn.
"Tun season-ah hrim hrim hi chuan kan theihna zawng zawngin kan khel lo, chu chu thudik a ni. Khelh that chang chu kan nei tho a, mahse hlawhtling turin kan khel tha tam tawk lo.
"Hun koh kir leha engmah lo mai atanga tan that leh chu kan duh chuang lo a, mahse bul kan tan that leh a ngai," tiin Jurgen Klopp chuan a sawi a ni
Post a Comment