Rauthla 17.Jan.2023 : Nimin khan ZPM chhung inkhawm hun hman a ni a. He hun hi PC Vanlalruata, Secretary General chuan kaihhruaiin, Rev. C Sangliana, PCI chuan hunserh a hmang a. ZPM Working President Pu K Sapdanga’n mi thar lawmluhna hun leh thusawina hun a hmang a ni.
Pu K Sapdanga, Working President chuan, “Kalphung thar mipui sawrkar din hi kan thupui ber a ni a, ZPM anga inthlanpui vawi hnihna hmachhawn turin kan party pawh kan inbuatsaih mek a, a tum khatnaah kha chuan pawl ding thar kan nih avangin thil fel tawk lo tam tak a awm a, party pawhin hmasawn zelin kalphung thar mipui sawrkar din turin vawiinah hian nasa lehzualin kan inbuatsaih mek a ni,” a ti.
ZPM Working President chuan, “Politics inthial mekah hian party lian pahnih te an kal ngaiin an kal ang a, keini ZPM party hi kalphung tharin kan kal thung dawn a ni. Vawiinah hian sum tam tak seng chung pawhin kum khat daih kawng takngial pawh kan siam hlei thei lo a, a pawi hle. Kan hma lawka inthlan lo awm tur hi corruption hi la hluar zel rawh se ti leh corruption hi um tawm ni rawh se ti pawl, kan ram hi chhe zel mah se a pawi lem lo ti leh kan ram hi lo tha ve tawh rawh se ti pawl, thatchhiat inzirtir zel pawl leh taihmah inzirtir pawl indona a ni dawn a ni,” a ti bawk.
Pu Sapa chuan, “Tunah hian ram puma campaign beihpui thlak tumin ruahmanna siam mek a ni a, nasa takin kan bei dawn a. Mizoram mipuite hian ZPM hi he inthlan lo awm turah hian an thawkrim ber a ni tih hi min hriat dan a ni tur a ni. Kan Leader Pu Lalduhoma pawhin ‘kan party zingah hian kei hi a thawkrim ber ka ni tur a ni’ tiin a lo sawi tawh a, Zoram mipuite hian kan thawhrimna hi an hmuh a ngai a, chumi tur chuan kan party-a awm zawng zawng i inbuatsaih ang u. Kan party hian kan campaign-na leh lamtang kan zawnnaah kut tlingin, Pathian duh zawngin hma i la ang u; chutiang tur chuan party-a ka thawhpui zawng zawng ka sawm tak meuh meuh che u a ni,” a ti bawk.
Post a Comment