Home Commissioner hovin G20 Business Meeting inbuatsaihna atana din Core Team thukhawm

 Rauthla 14.January,2023 : March ni 2 a Aizawl a G20 Business Meeting lo awm tur inpuahchahna atana din Core Team chu nimin chawhnu Nodal Officer  for Mizoram for Overall Coordination of G20 meeting Home Commissioner Pu H. Lalengmawia, IAS hovin Secretariat Conference Hall MINECO ah an thukhawm.

Pu H. Lalengmawia chuan Mizoram Sawrkar chuan meeting hi hlawhtling leh hneh taka thlen a duh thu sawiin meeting hi meeting naran mai ni lovin Mizoram leh Mizote hmel lanna bakah India ram hmel lanna pawh a tel dawn a, chuvangin kil tin atangin kan inbuatsaihna leh inpuahchahna te a tha em, a tawk em tiin kan ngaihtuah a ngai reng dawn a ni, a ti. Sub-Committee hrang hrang 10 din te chuan an ruahmanna te a felfai em, a tha tawk em tiin a khat tawkin an thlirho a ngai dawn a, chu mai bakah thawhhona tha tak kan neih a ngai dawn a ni, a ti bawk. 

Meeting ah hian Sub-Committee 9 te chuan ruahmanna an lo duan chhin te an tarlang a, hengte hi meeting ah zau takin sawiho a ni. Hemi atana sum mamawh te pawh sawiho a ni bawk. G20 Chief Coordinator, Foreign Secretary hlui, Pu Harsh Vardhan Shringla chu January ni 27 ah Aizawl ah hemi chungchang Mizoram Sawrkar hotute nen sawiho turin lo zin tura beisei a ni.

 December ni 1, 2022 khan India chuan G20 Presidency kum khat atan a chelh tan a. India Presidency chhung hian ram chhung khawpui hrang hrang 50 ah meeting leh event chi hrang hrang 200 aia tam buatsaih a ni dawn. Hengte hi Sawrkar Laipui chuan ramchhung khawpui lian bakah Hmarchhak state khawpuiah te a nghat dawn a ni.