Asia title chuh tur Awpa leh Zotea rualin Bangkok-ah Dinsanga

            A vawi hnih nan Thailand-ah Vanlalawmpuia leh F Zoramchhana an inhnek dawn a, WBA Asia title an chuh ang. An rual hian LPS Pro Fight flyweight champion Laldinsanga a fehchhuak dawn a ni.

        February 4 khian Spaceplus, Thailand-ah The Fighter world boxing buatsaih a ni dawn a, Thai fighter Phoobadin Yoohanngoh-a kawl mek WBA Asia super lightweight title chuhsak tumin kum 25 mi Awpa a inlan dawn.

        'The Animal' Awpa hian 2022 LPS Pro Fight lightweight title a hnek chhuah hnua a khelh leh hmasak ber tur a ni a, professional huangah ṭum ruk chak tawhin vawi khat a tlawm a, ṭum khat a inhnehtawk a ni.

           Thai rawlthar, kum 19 mi Phoobadin chuan professional boxing vawi 15 khelh tawhin a chak vek, December 3 kha a inhnek hnuhnun ber niin Filipino fighter Rimar Metuda a hneh a, Mizo tlangval lakah WBA Asia title humhim a theih ngei a inringtawk.

        WBA Asia bantamweight champion lai Yuttapong Tongdee-a hmaah Zotea'n fiahna a hmachhawn ve thung ang. Kum 29 mi Tongdee hian nikum October 1 khan Filipino boxer Herlan Gomez a knockout a, ṭum kua a inhnek tawhah chak vekin knockout-in vawi nga a chak.

        A inhnek hnuhnun berah Zotea a tlawm a, nikum September 30 khan LPS Pro Fight bantamweight final-ah Tuipui tlangval Lalrinngheta a hneh lo a, professional huanga ṭum hnih a tlawmna niin vawi li a chak tawh a, hmabak huphurhawm tak su tlang turin Bangkok a pan dawn a ni.

        Nikum July 2 khan Thai khawpui Bangkok-ah a vawi khat nan Awpa leh Zotea an fehchhuak a; The Fighter, world boxing show-ah Thai boxer ve ve Aekkawee Kaewmanee leh Yutthana Kaensa hnehin, inhnek buatsaihtu Thai promoter TL Promotions mittlunga an inlan avangin WBA Asia title chuh thei turin hun tha an neih theih phah a ni.

        Mizo rawlthar boxer zinga beiseiawm bera ngaih Dinsanga tan hun ṭha a inher chhuak ve nghal a; sang tak thlen tuma hma lam hun a thlir mek laiin a vawi khat nan India chhuahsanin a inhnek thei dawn a, Awpa leh Zotea ruala Thai khawpuia a inlan theih nan 3:16 Plan Solution senso tumsakin an sponsor.

        Kum 19 mi Dinsanga hian amah aia kum hniha naupang Jinnawat Samnual a bitum dawn a, Thai rawlthar hian vawi hnih a inhnek tawhah vawi khat chakin ṭum khat a tlawm.

        2022 LPS Pro Fight flyweight-ah chiang takin Lunglei rawlthar a champion ve thung a, a bitum zawng zawng knockout-in a hneh vek. Hemi rual hian professional a luhchilh tel nghal a, vawi hnih a chak zawn mek a ni.