Vawiin December 25, 2022 chawhnu dar 03:00 vel khan Lunglei lam atanga kala Pukpui khaw luh dawnah truck lian leh sei zet mai Low bed trailer a chesual a, thi leh hliam an awm lo nain he truck chesual hian kawngpui a dan tlat avangin lirthei che vel a tikhaihlak nasa hle.
A chetsualna hmun hi Pukpui Centenary lungphun thlen hma kawng kual ulh lai niin mita hmutute sawi danin kawng kuala muang changa a tlan chu a sei bakah kawng a kual ulh em avangin a kawi zo lova. A ke hnung lamin kawng thlang lam daiin a inelh thlu ta a ni.
He truck hi construction company pakhat Bhartia Infra Projects Limited (BIPL) ta nia hriat a ni a, kawnga a inkham tlat avangin eng lirthei chi mah a kaltlang thei lova.
A hnu deuhah 2wheeler kaltlang theih turin mi tlawmngaiten kawng chhak lam chu an lai a, leivunga side drain hnawhkhatin engtin tin emaw ni an tlang thei hlawm a. 4Wheeler tan erawh tlan tlang ngaihna a awm lo a ni.
Helai kawng hi Thenzawl paltlanga Lunglei leh Aizawl inkal pawhna kawngpui ATL road kal zel niin a chhehvel hi Lunglei thalaite len khawthawnna hmun ber a ni a. Vawiin pawh hian Krismas a lo ni bawk nen Pukpui chhehvel hmun nuam laia leng an tam hle a, he truck chesual hian a dangkhawm a.
2Wheeler an chhuah theih hnuah pawh lirthei pangngai te tan chhuah ngaihna a awm ve loh avangin mi tam tak an tangkhang a ni.
Post a Comment