Tukin zing dar 04:30-05:00 inkar vel khan Zokhawthar to Aizawl Sumo Service chu Chhungte daiah a chesual a, Sumo-a chuang mi 8 zinga 5 boralin hliam tuar an awm bawk. Sumo lengkir sang takah tlan liamin a chhe nasa hle.
Zokhawthar sumo chesual ta hi Aizawl atanga Zokhawthar pana tlan a ni a, an chetsual hmaa Sumo hnuhma enin driver mutthluk vanga chesual niin an ring a, thil chiang tak erawh a hriat rih loh.
Sumo-a chuang mi 8 zingah hian naupawm pakhat awmin a fanu kum hnih mi a chuanpui a, vanduai thlak takin nu naupawm hi vanduaina thlenna hmunah a boral a. A fanu kum 2 mi pawh hian hliam tuarin an hmuh tirh phei chuan rei a daih pawh rin ngam loh khawpin a na a, a thaw tawk tawk a. Mahse, Damdawi In thlenpuiin Oxygen an enkawl hnuah erawh a dinhmun a zia ta deuh niin an sawi.
Sumo tlan liamna hi lengkir sang tak niin Zokhawthar leh Aizawl inkar kawngpui hnuaia kawng thar an laih mek NH6 ah a zangthal a zu tla thla a, a sawp nasat bawk avangin ruang leh hliam lakchhuah mai theih a ni lova. Mi tlawmngai ten thing leh hmanraw dang nena tangkawpa an tundin hnuah an la chhuak thei chauh a ni
Passenger te hming list a awm loh avangin sumo-a chuangte hi tute nge tih hriat a harsa a, mitthite erawh hriat kim an ni tawh.
Accident-a boral ta te ruang hi Champhai District Hospital-ah postmortem turin phurh thlen a ni tawh a, hliam 3 zinga 2 hi an nat deuh avangin Aizawl panpui tura tih an ni bawk.
Nunna chan ta mi 5 zinga hmeichhe awmchhun hi Parthai, Kawilam khua niin ani hi hmeichhe naupang kum 2 mi nu kha a ni a, midangte hi kum 37 mi Mungsiandawng, Pakzang khua te; kum 32 mi Ginsiankhup, Sialtui khua te; kum 37 mi Tialliancheu, Chichai khua leh kum 36 mi Lallunghnema, Zokhawthar te an ni.
Post a Comment