Lawngtlai, November 7, 2022 : Pu Laldawngliana Sr. EE, P&E, Lawngtlai Division chuan Paithar tlangdunga Bungtlang South Power lakna hruipui kal tir chu sorkarin KMMTTP kawngpui kamah sawn a remtih thu a sawi.

Kumin October 14 a Current man vanga Rulkual khaw mi pathum thihna leh midang pahnih hliam an tawrhna chungchangah vawiin khan Paithar Group Young Lai Association leh Rulkual VC ten Power & Electricity Lawngtlai Division leh Lawngtlai SP Office te an dawr. 

He hunah hian Pu Laldawngliana Sr. EE, P&E, Lawngtlai Division chuan Paithar tlangdunga Bungtlang South Power lakna hruipui kal tir chu sorkarin KMMTTP kawngpui kamah sawn a remtih thu leh Survey neih a, Detail Project Report siam turin hmalakna kalpui mek a nih thu khawtlang hruaitute hi a lo hrilh a, zangnadawmna chungchangah vanduaina tawktu lam ten thil pawimawh tih fel ngai an neih te an tihfel hnuah Department chuan theihtawp chhuaha an lo bawhzui tur thu a a sawi.

Paithar khawtlang hruaitute chuan line siam a nih lai atanga vanduaina a thlen an lo hlauhthawn tawh thu leh thuneitu hnenah pawh vawi engemawzat an sawi tawh sorkarin ngaipawimawh a hmalakna kalpui a tum thu lawmawm an tih thu an sawi.

October 14, 2022 a Power line chhia siama thawkchhuak, Rulkual khaw mi pathum in nunna an chanphah chungchangah Lawngtlai SP hmuin, Paithar khawtlang hruaitute chuan, vanduaina thlenna chhan kimchang taka chhuichhuah a nih theih nan FIR thehluh that leh nise an ti.

Post a Comment

Powered by Blogger.