Lawngtlai, November 24, 2022 : Nimin khan Lai Autonomous District Council-in kum 50 a tlinna, Golden Jubilee lawmna pui ber ni hnihna chu CYLA Playground, Lawngtlaiah hman chhunzawm a ni. He hunah hian Central Young Lai Association aiawhin Pu Joseph Lalhmingthanga Chinzah, General Secretary Central YLA chuan thu a sawi.
Pu Joseph Lalhmingthanga
Chinzah, General Secretary Central YLA chuan, ‘India ramah tribal hnam tam tak,
keini aia population tam tam zawk, constitution hnuaia hriat hlawh miah lo an
awm laia keini mihring nuai khat pawh tling lo hi Sixth Schedule hnuaia awmin
District Council te kan nei thei a, kan vannei hle a ni. Hei hi Pathianin min
hriatna leh Pathian khawngaihna kan dawnna a ni’, a ti.
Central YLA General Secretary chuan, ‘Laifate hi hnam vannei tak kan ni a,
zalen takin kan awm mek a. Kan chhehvelah mi maktaduai tel sipai ral hlauin an
tlanchhe mek a, Laifate chu hengte buaipuitu, chhawmdawltuah kan tang mek a ni.
Khaw tin deuhthawah kan unaute raltlanin an awm mek a, raltlante buaipuiin YLA
a che a, LADC a che a, sorkar a che bawk. Tunah hian Bangladesh atangin raltlan
an lo lut leh mek a, Central YLA chuan theihtawpin a buaipui leh mek a ni’, a
ti.
Pu Joseph Lalhmingthanga Chinzah chuan, ‘Sixth Schedule te hi a sualin sualchhuak ve dawn ila, Lai mipuite hi Delhi-a India Gate kawta ding khawm tham lek kan ni a, kan sual chhuah theih rual loh Pathianin min pe a, lawmthu kan sawi tur a ni’, a ti a. YLA leh LADC hi kal hrang thei a ni lova, Pathianin District Council hnam bil angin min pe a, chumi tel lo chuan YLA hi a ding thei chuang lova, YLA tel lo hian LADC hian thachakna a nei tak tak thei chuang lova, thawhhona tha tak hnuaiah Laifate kan kal zel ang’, a ti.
Post a Comment