Lawngtlai, November 23, 2022 : Vawiin khan Lai Autonomous District Council-in kum 50 a tlinna, Golden Jubilee lawmna pui ber ni hnihna chu CYLA Playground, Lawngtlaiah hman chhunzawm a ni. He hun hi Pu V. Zirsanga, CEM LADC chuan khuallian niin a hmanpui a, Pu Amol Srivastava, Lawngtlai DC chu khualzahawm a ni bawk.

Vawiina LADC Golden Jubilee lawmnaah hian Pu L. Daniala, EM i/c Education (PS) chuan inlawmna thusawiin, Khualzahawm Pu Amol Srivastava, Lawngtlai DC leh Pu VL Hmuaka, Chairman LADC ten thu an sawi bawk.

Khuallian Pu V. Zirsanga chuan ram leh hnam humhalhna kawngah tan lak thar a tul tih sawiin, ‘India rama hnam hrang leh tawng hrang tam ziate, hnam lian pui pui tam ziate thlir chunga keini Laifa hnam tlemte hi engvanga rorelna hran nei ve nge kan nih tih hi kan ngaihtuahnaah awm se tih hi ka duh. Kan tawng leh kan hnam ziarang hi zah pui lo ila, Lai kan nihna anga khawvela inphochhuah tum ve in, ngaihtuahna thar i hmang ang u’, a ti a. ‘Lehkhathiam sang leh hlawhtling apiangin hnam dang nupui/pasala neih kan uar lutuk deuh niin a lang a. Hei hi hnam inchimralna kal kawng a ni’ a ti bawk.

Pu V. Zirsanga chuan, ‘Lekhathiam kan pung zel a, thawh tur nei lo an pung tual tual a, Laifa ten roelna kum 50 kan nei tawh, direct-a IAS inziaktling pawh kan la nei lo. Hnam zahawm leh he hnam hi chawikana a awm theihna tur chuan chuan zirnaa mi hlawhtling kan neih tam dan a zir a ni ang’, a ti a. ‘Kan ram chu hmasawnnain min tuam mek a, hetih lai hian thalai ruihhlo bawiha dawi at kan tam lutuk. Ram hi kan nei ang a, a luahtu mihring kan awm lovang tih a hlauhawm hle, a ti bawk. ‘Hlawh hmu tlak lo sorkar hnathawk, rawih tlak loh Mistiri, Helper kan tam ta lutuk, hnam zahawma kan awm theihna turin rinawmna nen taihmakna nen chanvo kan neih hi i hlenchhuak ang u’, a ti.

Pu V. Zirsanga chuan, ‘Politic kan kalpui dan thlir nawn a tul tih sawiin, ‘kan ram politic virvel hi Mizoram kal danah thui tak a innghat a ni. Eng party pawh ni ila kan ram leh hnam damna tur thilah chuan thukhat vuaa ke kan pen thiam a ngai ta. Mahni leh mahni indo zawng, inhnukhniam leh intichhe zawngin politic kalpui a hun tawh lo’ a ti.

LADC CEM chuan, ‘Kan unau Bawm te an ram buai avangin Parva leh a chhehvelah raltlanin an awm mek a, kan lainat takzet. An laka kan thiltih theih chu kan insum dawn lova, lungngai leh thlaphanga an awm kan remti dawn lo’ a ti. 

Post a Comment

Powered by Blogger.