Bualpui Ng, November 23, 2022 : Lai Autonomous District Council in kum 50 a tlinna, Golden Jubilee lawmna chu Bualpui NG ah vawiin khan neih a ni.
LADC Golden Jubilee lawmna hi Revenue & Settlement Office, Sub-Hqrs; LADC, Bualpui (Ng) ah neih niin, he hun hi Pu Zirliantluanga Tinthe, Revenue & Settlement Officer, Sub-Hqrs; LADC, Bualpui (Ng) in a kaihruai. Pu Zirliantluanga Tinthe chuan, ‘Pawi/Lakher Autonomous District Council kan nih aṭangin vawiin kum 50-na Golden Jubilee hun hman a ni thei hi a lawmawm hle a ni tiin kalkhawm te Jubilee Chibai bukna a nei a, Laifate tun aṭanga hmasawnna tur kan neih kawng hrang hrangah hmasawnna lam hawi a hun hmang ṭheuh turin duhsakna a hlan.
Rev. Ngursangpuia, Isua Krista Kohhran, Bualpui (Ng) Bialtu Pastor-in hunserh hmangin, ‘LADC hi Laifate tan Pathianin min pe a, mahni ram leh hnam tan a chhunga awm leh hnathawktu ten rinawm taka thawh ṭheuh a ṭul tawh’, a ti.
Vawiina Bualpui NG a LADC Golden Jubilee lawmnaah hian LADC Staffs, mi pawimawh tak tak leh Upa kalkhawm ten Jubilee Dar Vawi-50 vuakna hun hmangin, Jubilee hun hi ropui taka hman a ni. He hunah hian Pu. Rorelliana, CEO, Eastern Circle, LADC, Sub-Hqrs; Bualpui (Ng), Pu. TC. Thangvunga, Dy. Range Officer, EC&FO, LADC Sub-Hqrs; Bualpui (Ng) leh Upa N. Kilsaia President MUP Bualpui (Ng) Unit te aṭangin thusawi ngaihthlak a ni.
Post a Comment