Lawngtlai, November 22, 2022 : Vawiin khan Lai Autonomous District Council-in kum 50 a tlinna, Golden Jubilee lawmna pui ber ni khatna chu CYLA Playground, Lawngtlaiah hman a ni. He hun hi Pu H. Biakzaua, Vice Chairman, Agriculture Development Board chuan khuallian niin a hmanpui a, Pu Lalmalsawma Zasai, Dy. CEM, MADC chu khualzahawm a ni bawk.
Golden Jubilee lawmna nikhatnaah hian Pu BN Thangpuia, E.M. i/c Art&Culture etc. chuan inlawmna thu sawiin, Pu H. Lalruatkima, Executive Secretary, LADC chuan report a pe bawk.
Khuallian Pu H. Biakzaua, Vice Chairman Agriculture Development chuan, kum 1953 ah Pawi - Lakher Regional Council pek kan ni a, kum 1972 ah Pawi Autonomous District Council kan nei a, kum 1988 ah Pawi tih chu Lai tia thlak a ni, a ti.
Khuallian Pu H. Biakzaua MLA chuan hnam leh ramah kan chian a ngai tih sawiin, ‘khawvelah hnam leh tawng tam tak a boral tawh a, keini hnam tlemte, ram zim te, mahnia ro inrel thei tura kan awm hi thangtharte hian a hlutna kan hriat chhuah a tul hle. Hnam fing leh ram changkang apiangin an hnam an chawimawi a, an zahpui lova, a than chhohna tur an ngaihtuah zawk thin a. An tawngte, an ziarangte an humhalh thin’, a ti.
Khuallian chuan kan ram chhunga natural thil kan duat a ngai tih sawiin, 'Lairam zimteah hian Ramngaw kan la nei tha a, heng ramngaw kan neih chhun te hi hmangaih tak leh duat taka kan enkawl a ngai a. Lui leh tlangte pawh kan enkawl that a ngai a ni', a ti.
Pu H. Biakzaua chuan zirna lamah kan than nasat a ngai tih sawiin, ‘kum 50 kan than chhungin IAS pawh kan la nei lova, UPSC, MPSC ah kan tling thei lo em em a, National level ah emaw Mizoramah pawh nise kan thalai ten zirna mai bakah kan talent neih te haichhuak a, he ram leh hnam tana tan kan lak zel a pawimawh a. Kan Lai tawng, kan Lai thawmhnaw leh kan Lai ziarang thil tam tak te hi humhalh tum thin mahila, Laifate hi khawvel dang tukverha dak phak ve a, zirna lama kan intlansiak loh chuan he kan nihna atang ringawt hi chuan khawvel ram dangte kan phak lo thuai dawn a ni’, a ti.
Kawng hrang hranga hmasawnna hmu turin leh tihlawhtling turin mipuiin sorkar dinglai kan thlawp thiam a tul tih sawiin, Pu H. Biakzaua chuan, ‘Pu Zoramthanga kaihruai Mizoram sorkarin kan district tan hna tam tak a thawk tawh a, Sport Infrastructure lamahte, tui in tur hnianghnar kan neih theihna tur lamah te, supply lamah te leh kawng hrang hrangin hma a la a, hmasawnna ruhrel bun mek tam tak a awm bawk’, a ti.
Pu H. Biakzaua chuan Kohhran leh political party-ah ngaihdan hrang hrang nei mahila, kan ram leh hnam hmangaihna kawngah erawh hi chuan kan inpumkhat a ngai a ni, a ti bawk.
LADC ah hian elected member 25 leh nominated member 4, an vaiin Member of District Council (MDC) 29 an awm mek a. A huam chhung ram zau zawng hi square kilometre 1,870.75 niin, village council 97 a awm a. Chhungkaw 21,358 awmin, mihring cheng zat hi mi 1,03,456 vel a ni.
Post a Comment