Lawngtlai, October 11, 2022 : Vawiin khan Lawngtlai District Football Association chuan a hnathawh avanga Aizawl sawn an Treasurer Pu Rohimliana (Chatea) thlahna chu a chenna Inah an nei.
He hun hi Pu Edwin Lalhuliana, Hon. Secretary chuan kaihruaiin, LDFA tan mi pawimawh tak, a hna avanga hmun danga insawn tur Pu Chatea kan thlah tur hi LDFA tan a uihawm hle a ni, a ti.
Pu C. Hrangthianga, LDFA President chuan, mahni hnaa mi rinawm leh mi rintlak, hnathawh that avanga hmun danga insawn tur LDFA in kan nei hi a lawmawm rualin, LDFA tan chuan a uihawm tak zet a. Football inrelbawlnaah hun rei vak lo kan thawhhonaah pawh hian amah ah inzir tur tam tak kan nei a ni, a ti. Pu Chatea chu khawi hmunah pawh awm se, mahni hnathawhna kawngah rinawm tak leh taima taka thawk zel turin duhsakna a hlan a. LDFA tan pawh mi tangkai tak ni chhunzawm zel tur pawhin a chah bawk a ni.
Pu Rohimliana (Chatea) chuan, hun rei lo LDFA hruaitu nihna ka chelh ve a, thawhhona tha tak nei a, football hmasawnna tura hna kan thawhna hrang hrangah kan tanrualna hi a ropui ka ti a. Hei hi i chhawm nung zel ang u, tiin LDFA hruaitute a chah a ni.
Pu Rohimliana (Chatea) hi MizoFed Aizawlah Manager hna chelhin a awm dawn a. Amah ngaihhruina thuziak chu Pu Elvis Lalthangzuala, Sr. Vice President in a hlan a. Pu Laltholeha, Hon. Vice President in hunserh a hmang bawk a ni.
Post a Comment