Lawngtlai, October 12, 2022 : Lawngtlai Auto Rickshaw Owners Association member thahnem tak chu vawiin khan DTO Office tualah pungkhawmin, Mizoram sorkarin Lawngtlai khawpui tana tunhnaia permit 68 a pek chhuah duh loh na lantirin DTO office kai tur an dang a, permit thar hi sut turin sorkar an ngen.
Lawngtlai Auto Rickshaw Owners Association hruaitute sawi danin, Permit hi Mizoram sorkarin tichhuak tawhin, tunah hian DTO Office Lawngtlaiah a awm tawh a, a neitu ten an la la chhuak lo. September 22, 2022 khan Press Conference neiin Rickshaw permit pe chhuak lo turin sorkar a ngen tawh a. Permit pe chhuak lo tura an ngen hi sorkarin ngai pawimawh lovin Lawngtlai khawpui chhung tan permit 68 a pe chhuak a, hei hi an duh loh thu sawiin, permit an pek chhuah hi cancel turin sorkar an ngen. Permit thar hi sorkarin October 10, 2022 khan a pe chhuak niin an sawi bawk.
Lawngtlai Auto Rickshaw Owners Association President B. Hmingchungnunga chuan, tunah hian Lawngtlai khawpui chhungah Auto Rickshaw Service lai 400 chuang hret a awm a, heng Auto Rickshaw te hi Stand 4 siamah chep taka an din thin thu te, Stand a dinglo, an member ni lo khawlaia Passenger zawng a tlan kual an awm reng thu a sawi a, hetianga Stand-ah pawh an len tawh loh lai a, Sorkarin Permit a pe chhuak chu an hriatthiam loh thu a sawi a. An ngenna tihhlawhtlin a nih hma chuan an thiamdan ang anga an beih zui zel tur thu a sawi.
Post a Comment