Lawngtlai, October 11, 2022 : Nimin khan CYLA Drugs Reduction Squad hruaitute leh Excise & Narcotic Department Asst. Commissioner te chu Excise & Narcotic Department Lawngtlai Office-ah inkawmin, tun hnaia CYLA DRS te hmalaknate an thlirho a ni.
CYLA DRS te hi Pu T. Lalremsanga CYLA Asst.Secretary in hoin, Pu Eden Lalrammawia Chinzah Vice Chairman CDRS, Pu. M. Saingura Secretary, Lalpuiliana Thangnget, Information Secretary ten an tawiawm.
Lunglei leh Lawngtlai bialtu Excise & Narcotic Asst. Commissioner Pu Pc Lalchhanhima hi Pu Lalrengpuia Officer In-Charge, T. Vanlalfinga SI leh thawktu dang ten an tawiawm bawk.
Excise & Narcotic Asst. Commissioner Pu Pc Lalchhanhima chuan, ruihhlo a bikin, damdawi no-4 hluar zel do tura CDRS a ding hi a lawmawm hle a, ruihhlo dona kawngah Excise department nen thawhhona kan nei tha hi a lawmawm hle ni, a ti a. Hun lo la kal zel turah thawhhona tha neih a beisei thu sawiin, Lawngtlai Excise department te theihtawpa tawiawm zel turin a sawm bawk a ni.
CYLA Asst. Secretary Pu T. Lalremsanga chuan, kan Lairam chhunga ruihhlo, a bikin Damdawi No-4 hluar lutuk chu CYLA chuan veiawm a ti a, hemi chungchangah hian YLA Lawngtlai Town Branch te kokhawmin Ruihhlo beihpui thlak dan tur sawi ho a ni a, chumi hnu chuan CYLA rorelna sang CEC ah te put luh leh a nih hnuin kan rama Ruihhlo hluar zel dona turin CYLA Drugs Reduction Squad (CDRS) hi lungrual takin din a ni ta a ni, a ti.
Pu T. Lalremsanga chuan, CYLA DRS te leh Mizoram Excise & Narcotic leh Mizoram Police te hian tun dinhmunah Lawngtlai District chhunga ruihhlo beihpui thlaknnaah thawhhona tha tak an neih thu leh, thawhhona tha nei chhunzawm zel tur a a duhthu sawiin, Mizoram Excise & Narcotic leh Mizoram Police te chungah lawmthu a sawi bawk.
Thusawitu dang Pu Eden Lalrammawia Chinzah Vice Chairman CDRS chuan, ruihhlo beihpui thlak meka CYLA DRS te leh Mizoram Excise & Narcotic leh Mizoram Police te thawhhonaah Mizoram Excise & Narcotic leh Mizoram Police pawh an thawhhona zawnah harsatna an neih pawhin CYLA DRS ah sawiin, inpuihtawn dan kan zawng ang a, a tul chuan an tan ding ang a, a tul chuan kan thawhpui zel ang, a ti a. Mimal emaw pawl emaw tih bik kan nei lova, ruihhlo kan dona kawngah hian thawhhona tha kan neih theihna turin leh ruihhlo tihrem a nih theihna turin hma kan la a ni, a ti.
Pu. M. Saingura Secretary chuan, CDRS hi kumin September 2 khan Central YLA CEC in din a ni a, September 14 atang khan hmalakna neih tan a ni, a ti a. Tun thlengin No-4, Zu leh Ganja thahnem tak man tawh niin, hemi kaihnawihah hian mi 64 man an ni tawh tih a sawi. Pu M. Saingura hian Excise & Narcotic Asst. Commissioner hnenah Lawngtlai Excise department-a thawktu tlem lutuk leh an indaih loh thu leh a dang lo dah belh turin a thlen nghal a. Excise & Narcotic Asst. Commissioner hian SI mipa pakhat leh hmeichhia pakhat lo dah a nih tur thu a sawi.
CYLA DRS chuan tun hnaia ruihhlo an mansak mi phakhat, Excise & Narcotic department lama an pek tak case chungchangah Excise & Narcotic Department Lawngtlai thawktute vau leh rikrap ching an awm tih sawiin, hei hi Central YLA DRS chuan tha an tih loh thu sawiin, ruihhlo donaah hian mimal, chhungkua, tupawh tihbik an neih loh thu leh, angkhat veka an en thu an sawi a. ‘Excise & Narcotic Department leh Police te chungah hetiang thil hi a thleng leh a nih chuan Central YLA DRS te chuan a tul angin action kan la ang. Tun hnuah hetiang thiil hi thleng nawn tawh lo se kan duh a ni, an ti.
Post a Comment