Chawngte a Adopt-a-School a tana thlan School pathum naupangte hnenah Awareness Campaign neih a ni

Chawngte, October 11, 2022 : Lawngtlai District chhunga zirna tihhmasawn nana Lawngtlai Bawrhsap Pu Amol Srivastava leh District Administration hnuaia officer-te hma laknaa "Adopt a School" project kalpui mekah vawiin khan Chawngte Sub-Division huam chhunga "Adopt a School" atana thlan sikul pathuma zirlai naupangte tan Kamalanagar Public School-ah awareness campaign buatsaih a ni.

He awareness campaign hi Chawngte Sub-Divisional Officer (Civil) Dr Manesia Khaimeichho chuan a hawng a. Chawngte Sub-Division huam chhunga sikul pathum thlan chhuahte tana a huhova thupui pawimawh tak tak zir hona buatsaih chu zirlaite hmasawnna atana hmanraw pawimawh tak a nih a beisei thu sawiin, an thil zir aṭanga hmasawnna duhawm tak puak chhuah tum turin zirlai kal khawmte chu a chah a ni.

He hun hi Pu A. Rualthanzauva'n a kaihruai a. Police Inspector Pu Lalsanga chuan naupangte'n harsatna an tawh theih dan leh naupang himna chungchang sawiin, Cyber Crime chungchang a zirtir a. Official hrang hrangin thu sawina hun hmangin, zirna lama hmasawnna tur te, hriselna chungchang te, ruihhlo leh mipat hmeichhiatna kawnga fihlim tura inzirtirna te, khawtlang nuna khawsak hona chungchang leh thupui ṭha tak tak hmangin inzirtirna hun hman a ni.

Vawiina awareness campaign buatsaihah hian Chawngte Sub-Division huam chhunga Adopt a School hnuaia zirna in pathum - Kamalanagar Higher Secondary School aṭangin zirlai 65, Baganpara Public School aṭangin zirlai 38 leh Kamalanagar Public School aṭangin zirlai 198, an zavaiin zirlai  301 an tel a ni.