Rauthla, September 02, 2022 : Pu Zoramthanga President leh Chief Minister ni bawk chuan, 'SEDP hi khawi atanga sum puk emawa sem kan ni lo a, kan budget aṭang ngeia sem kan ni, a ti a. Kumin chhhung ngeiin SEDP 1st installment cheng singhnih sangnga leh 2nd installment singhnih sangnga theuhin kan sem dawn a ni a ti bawk.

Vawiina MNF Hnam Runa chhung inkhawm ah Pu Zoramthanga chuan Opposition lamin Covid hripui leh harsatna hrang hrang kara kan awm laiin ‘SEDP sem rawh se’ an ti thin tih CM chuan sawiin, “Pathianin rem a ruat zel a, SEDP pawh tunah kan sem ta mek a ni. Tun financial year chhung hian chhungkaw sing ruk hnenah cheng sing nga theuh pek an ni dawn a. Financial year tharah cheng singnga lo dawng tawhte pek belh an an ni ang a, chumi piah lamah chuan dawng thar tur sing tel kan pek belh leh dawn bawk a ni,” a ti.

Chief Minister chuan Covid hripui avang leh chhan hrang hrang avangin khawvelin sum harsatna a tawh mek ang Mizoram pawhin kan tawk ve mek tih a sawi a. “Sum dinhmun kan harsat lai takin Delhi-in CSS sum release vek turin State zawng zawng min ti a, vaibelchhe 600 kan release a. SEDP-ah vibelchhe 150, electric kan leina atan vaibelchhe 37, PMGSY-ah vaibelchhe 70 kan release bawk. Tun hnaiah hlawh leh thil pangai piah lamah vaibelchhe 800 dawn kan release a ni,” a ti a. “Pathianin rem a ruat a, kan ti thei zel a ni,” a ti.

Finance minister ni bawk chuan ni danga Mizoram-in a la hmuh ngai loh union budget-ah Aizawl bypass road siamna tur vaibelchhe 500 leh bamboo link road laih nan vaibelchhe 100 dah a ni chu lawmawm a tih thu a sawi a. “Aizawl bypass road hi survey neih mek zel a ni a, Sihhmui atanga Muallungthu piaha chhuak turin ruahmanna siam mek a ni. Bairabi – Mamit national highway-a puang tura kan ngenna pawh min tihhlawhtlin sak a, kawng laihna leh enkawlna man tur Mizoram sorkar kutah an dah a, a lawmawm hle a ni,” a ti bawk.

Pu Zoramthanga chuan Congress chu Delhi lamah pawh inthlang hlei thei lo khawpin an buai tih a sawi a. “Bang si, thu ber tum bawk si Rahul Gandhi an nei a, an buai hle a ni. Mizoramah pawh hian MLA pahnih khat bak an neih a rinawm lo,” a ti a. ZPM chungchang sawiin, “Candidate tur an lo insawm tam lutuk an la buai nasa dawn chauh. Pawl lehlamin candidate an lo sawm tam tawh lutuk a, pawl leh lam zin chhuakin an sawm zung zung zel bawk si a, nomination committee ṭhu se an buai nasa khawp ang,” a ti.

Post a Comment

Powered by Blogger.