England Lalnu, Queen Elizabeth II chu 8th September, 2022 khan kum 96 mi niin, British sannaa tlai lam dar 4:30 ah Balmoral Castle,Aberdeenshire, Scotland ah a boral anih kha. Khawvelin a uiin, a sun tak meuh meuh a, India ram pawhin a sun mek.
Queen Elizabeth II hi Prince Albert leh Lady Elizabeth Bowes Lyon te karah Elizabeth Alexandra Mary tih hmingpuin April 21,1926 khan a piang a.February 5,1952 khan United Kingdom leh Northern Ireland Lalnu niturin nemngheh a ni. A piantirh atanga Lalnu ni tura rinkai leh, lalna an inhlan chhawn danah pawh Lal ni tur a ni bik chiah lo!
Kum 1936 a Elizabeth-i pu,George V a thih khan a patea, Edward VIII khan Lalṭhutthleng a rawn rochun a. Mahse, a lal hnu reiloteah American nuthlawi Wallis Simpson nen an inngaihzawn avangin Lalṭhutthleng luah zawm thei lo dinhmunah a ding a, nuthlawi leh lalthutthleng a buk ta a nih kha!
Atawpah King Edward VIII chuan nuthlawi ngaihzawng chu thlang zawkin Lalṭhutthleng chu a unaupa, Elizabeth-i pa nibawk - King George VI hnenaha hlanchhawng a, a nupui, Elizabeth-i nu chu Queen Elizabeth tih hmingpuin, Lalnu alo nita bawk a ni.
Kum 1952 khan King George VI chu boral velehin a nupui chu Queen Mother tia koh a ni a, an fanu Elizabeth-i chu Queen Elizabeth II tia vuahin Lalnu alo ni ta a ni. Queen Elizabeth II hi June 2,1953 khan Lalnu atan nemngheh niin hetihlai hian kum 25 mi chauh ala ni nghe nghe a ni.
A pa boral avangin February ni 6,1952 khan Lalnu mawhphurhna lo la tawh mahse a kum lehah Lalnu atan an nemnghet chauh.
Queen Elizabeth II nu leh pate hian London leh Windson Great Park-a an chenna an kartawn nasa viau ṭhin a. A unaunu, Margaret-i nen In lamah a nuin zirtirtu ruaiin lehkha an zi a. French, Mathematics te leh History te an zir nasa bik a, lam te, zai leh arts lam pawh an zir nasa viau bawk.
Kum 1939 a Indopui pahnihna a rawn chhuah khan Elizabeth-i te unau pawh London aṭangin Windsor-a an Lal In lamah an insawn a. Kum 14 mi lek la niin Radio-ah thu a sawi tan a, indona avanga an in leh lo chhuahsana tlanbo te, an chhungte nena inṭhen hrang naupangte chu hnemin, 'Atawpah hnehna chu kan chang ngei ang, Pathianin kan rumna leh manganna te a hria a, hnehna hlu tak kan chang anga, ralmuang takin kan awm ngei ang' tiin a thlamuan hlawm a ni.
Kum 1945 khan indonaa aṭul ṭul titura thawk, Auxiliary Territorial Service-ah ṭang vein motor khalh leh siamte zirin a hun a hmang ve lawp lawp a. A hun hmanchhung hi reilo hle mahse Lalchhungkaw nun piahlamah zalen takin hun a hman theih phah a ni.
Elizabeth-i hian kum 1947 November 20 khan a nu lam aṭanga an lamhnai Phillip Mountbatten chu London-a Westminster Abbe ah tiam tlat e tihpuiin, ropui takin an innei a. Phillip-a nen an inhmuh hmasak ber hian kum 13 mi chauh a ni.
Anni pahnih hi mize inanglo tak an ni a. Elizabeth-i hi ngawichawi tak leh inthlahrung mi tak anihlaiin; Phillip-a ve thung erawh chu rawl ring tak,ṭawng phawng phawng mai mi a ni a. Elizabeth-i pa, King George VI khan an inneih hi rem a tichiahlo a, a chhanchu Phillip-a te hi Greek leh Danish Lal thisen kai an ni a, a hausa tehchiamlova, a nungchang pawh a phawkphawhraw viau niin an sawi bawk.
Phillip-a hian inbuatsaih lem lova vantlang hmaa thusawi phawng phawngte a ching a,inhnialna chawkchhuak thei thu tam tak a phuhchhuak awl lo bawk. A kawppui lakah a rinawm tehchiam lo niin an sawi bawk.
Elizabeth-i leh Phillip te hian kum 1948 khanfapa, Charles an nei a. Kum 1950 khan fanu Anne neilehin, kum 1960 ah Andrew leh 1964 ah Edward te an nei leh bawk a ni.
Kum 1969 khan amah thlaktu turin a fapa upa ber, Charles chu sorkar hriatpuinain a nemnghet.
Elizabeth-i rorel hun chhung hi a rei hle a,a lal chhung hian a ramchhunga politics chungchangah a inhnamhnawihlo a, a ngaihdan pawh vantlang hmaah a sawichhuak ngailo bawk. Chutihrualin, an Prime Minister te erawh a titipui fo a, a kawm fo thung.
Kum 90 a tlin hnu pawhin kumkhat chhungin vawi 400 vel mi pawimawh ala kawm ziah a, mite ṭanpuina atana thil buatsaih engemawzatah ala inlan ziah bawk a ni.
A lal hun chhung hian Prime Minister 15 zet a thawhpui hman a. Chawlhkartin arukin a kawm ziah bawk.
Lal a nihhnuah an ram awp tam takte chu mahni kea ding turin thuneihna pein, a tizalen hlawm a, Commonwealth of Nation alo pian phah ta a ni.
Lalnu anih angin Elizabeth-i hian Lalchhungkuain tihdan phunga an lo neih tawh, an hmanlai tihdan phung tam tak paihin, tunlai nena inrem thei turin a her rem nasa em em a. Lal hmun pawimawhṭhenkhat leh an ro thil ṭhenkhatte pawh mipui tlawh theih tur leh hmuhtheih tura pholan a remti a. Britain-in ram ramdangte ang bawka sum leh pai lama harsatna an tawh lai khan, kum 250 bawr vel lai an lo kalpui tawh, Lalchhungkaw tana mipui sum thehchhuah thin chu a hmanna tur thenkhat a lo titawp tawh bawk a ni.
A fapa upa ber, Charles a nupui, Diana thih chungchangah khan rampumin an sun lai leh uitu tamtak a neih laia Lalnu berin uina thu emaw sunna thu emaw a chhuah lawk lo kha mi tamtak ngaihdan a ni lo hle a. Lalnu a nihna anga a mawhphurhna leh a mo a nihna anga a mawh phurhna hlen lo angin an ngai a, an sawisel nasa hlawm hle.Sawiselna a tawh vak atanga chawlhkar khat hnuah Diana a ui thu leh a sun thu hi thuchhuah siamin a tarlang ve ta nghe nghe a ni.
Kum 2012 khan Lalṭhutthlenga a ṭhut kum 60-na lawminkum 2015, September ni 9 khan Lalṭhutthleng lo luah rei ber tawhtu, Queen Victoria Lalṭhutthleng luah chen chu pel chiahin, Lalṭhutthleng luah rei ber a ni zui ta bawk.
Kum 2017,February ni 6 khan Lalṭhutthleng a luah kum 65-na an lawm leh a. He hun erawh hi chu a pa boralta hriatrengna nipahfawmin, thawm nei lem lovin, Sadringham Biak Inah a hmang thung a. A inkhawm.
London-ah ve thung chuan a lawmnan silai an lo kap puak ul ul a, Pawisa thir thar 8, a lal kum 65 tlin lawmnan hian an siamchhuak nghe nghe.
Kum 2022 khan rampum huapin Lalṭhutthleng a luah cham kum 70-na an lawm leh a. Britain Lalṭhutthleng a kum 70 rorel thei hmasa ber leh rorel rei ber a ni ta a ni.
Elizabeth-i hian ui a ngaina em em mai a. A tleirawl chhuahtirha Corgi ui an pek chu chhuan 30 thleng a vulh nghe nghe a. Ui bakah sakawr angaina hle bawk. Sakawr chi hrang hrang vulhin, intlansiakna pawh vawi duailo a lo chhim nghe nghe. Tin, hei bakah hian hmun reh taka awma, lehkhabu chhiar a ngaina a, puzzle hi a tuipui em em bawk a. Tin, wrestling a en hrat hle bawk.
Tunhma angin England Lalnu hian ram inrelbawlnaah thuneihna va nei tawh lo mahse, Lal an nih avanga midangte neih ve loh thuneihna a neihte hi a satliah lo hle a. A langsar zual tarlang lawk teh ang.
License tellovin motor a khalh thei – UK ah hian amah chiah hi license tellova motor khalh thei a ni a. Indopui Pahnihna hunlai atang khan motor khalh hi a lo thiam tawh a ni.
Passport tellovin khawi ramah pawh a zin thei – Lalchhungkaw member (Royal Family) dangte hian ram danga an kal dawn hian passport an neih a ngai ve a. Lalnu erawh hi chuan khawiramah zin dawn se passport a mamawh ve lem lo. Passport hi ama hminga pek vek a ni bawk.
Birthday kum khatah vawi hnih a lawm thin – A official birthday hi April ni 21 ah a lawm thin a, a birthday pakhat zawk chu June thlaah an lawm thin!
Ama pualin pawisa chhiarna a nei – Buckingham palace hnuaiah he pawisa chhiarna hi an dah a. Coutts& Co. in an enkawlsak.
Ramsa tamtak a nei – A ui vulhte bakah Thames lui a Vatawk zawng zawngte, a ramchhung luia Dolphin, Whale leh sangha chi khat Sturgeon zawng zawngte hi a ta vek an ni.
Tax pek ve a ngailo – Eng tax pawh hi a duh phawt chuan a awl thei a. Mahse kum 1992 atangin tax thenkhat chu ama duhthuin a peve.
Police-in an man ve thei lo – Danin a chungah ro a rel ve thei lo a. Lal chhungkuate hian an thil neih hlut zawng leh eng information pawh tu paw’n dil se an duh chuan an pe lo thei.
Thu leh hla lama mi ril (Poet) kan tih ang hi ama pualin a nei – Carol Ann Duffy hi tuna lalnu poet hna chelh mektu a ni. He hna hi ‘honorary’ a ni a, thu leh hla lama mi ril bik te chauhin an chelh thin.
Sakhua/kohhran hotu a ni – England a kohhran pakhat ‘Church of England’ hotu lu ber a ni a. Sakhaw dangah a inlet thei lo a, kohhran dang pawh a zawm thei lo. Kohhran dang zawm emaw sakhaw dang a zawm dawn chuan a lalthutthleng a kalsan a ngai.
Queen Elizabeth hian a upat hnuah pawh a upatna lang miah lovin a tih tur hrang hrang a hlen tha hle a, a pasal Philip-a’n kum 2021 April ni 9-a a boral san hnu atang khan lungleng taka hun hmangin a zam a zal sawt hle a.Khawhar hle mahse dam lo chau taka a awm hnu thleng khan, lal chhungkuaa tel duh lo, a monu Meghan Merkel erawh a bul hnaia a awm a duh ngai lo a ni.
Queen Elizabeth II hi India Sanaa September 19, 2022 (Thawhtanni) chawhnu dar 03:30 khian Westminster Abbey, London-ah a vuina hun hman a ni dawn a. A ruang hi Sasaw thing atanga siam Kuangah zalh niin Balmoral Castle, Edinburgh atangin London panpui a ni ang a, zah taka vuiliam a ni dawn a ni.
Lalnu a boral takah chuan a aiawh turin Prince Charles chu King Charles III tih hming puin Lal atan lakluh a ni ang a. An hnam hla ‘God Save the Queen’ tih pawh ‘God Save the King’ tih a ni tawh ang.
Post a Comment