Lawngtlai, September 02, 2022 : Pu H. Lalruatkima, Executive Secretary LADC chuan, MJA Lawngtlai District te lengah sawmin, a roomah inkawmhona hun an hmang a, he hunah hian MJA Lawngtlai te nen thawhhona tha tak neih a duh thu a sawi.
Pu H. Lalruatkima chuan, Pathian zarah he hna thawk theia ka awm chhung chuan MJA Lawngtlai te nen hian thawhhona tha tak neih ka duh a, ka sawm bawk che u a ni a ti a. Mihring famkim lo leh thil tisual thei leh kan tihawm tak tih loh pawh kan nei thei a, chung zawng zawngah chuan min finchhuaha, a tul ang zela thurawn min pe thin turin ka sawm duh bawk che u a ti.
Chanchinbu mite chu kan ram leh hnam tan an hlu tih sawiin, Pu H. Lalruatkima chuan Chanchinbu Editorial te hi mitam takin kan chhiar thin a, heta tang hian mipuiin Editor-te dinhmun tur hi kan lo thlir thin bawk a, chuvangin, kan ram leh hnam thatna tur leh hmasawnna tur hi Editorial in ziah atang hian thui tak a innghah thin a, LADC kan neih hlutzia leh hma kan sawnna tur mipui hnena zirtirna lam hi puangzara hma min lakpui hi ka duh hle a ni a ti a. Mi tam takin Social media ah LADC sawiselna leh a hmalaknate an sawisel thin a, an sawi ang zawng zawng hi a dik vek bik lo thin niin kan hria a, chuvang chuan, thudik zawk leh rintlak zawk puangzar thintu in nih angin, thawk hona tha tak nen, LADC hmalam hun thlir chungin hma ila ho zel ang a ti.
Pu Lalngheta Ralte President MJA Lawngtlai chuan an phak tawk leh an theih ang chinchinah lungrual taka LADC nena thawhho zel tha a tih thu a sawi a. Social Media hman kawngah fimkhur a tul thu sawiin, mipui leh sorkar hnathawkte ngei pawh kan fimkhur tlan a ngai a, Sorkar hnathawkte sawiawm a ni em, tih tur hi Social Media-ah hmuh tur awm leh zeuh thin pawh hi kan inhrilh hriat ve deuh chu a ngaiin ka hria, a ti.
Post a Comment