Chawngte 'P', September 26, 2022 : Lawngtlai West Bialtu MLA Pu C. Ngunlianchunga chuan vawiin khan MLA Fund atanga sak Chawngte 'P' YMA Library a hawng.
MLA Pu C. Ngunlianchunga chuan a MLA fund hmanga cheng nuai 6 senga sak YMA Chawngte 'P' Branch Library a hawnnaah thusawiin, khawtlang hmasawnna turin dikna leh rinawmna nen khawtlang rawng bawlin, rin tlak leh rah tha chhuah turin hna thawk ila, ruihhlo laka inthiar fihlimin, mahni kut kea ding thei turin thalaite inbuatsaih ang u, a ti a. Chawngte 'P' khawtlang hmasawnna tur a Library ṭha tak sak a nih theih leh thawhhona tha tak hmanga sak zawh a nih chu lawmawm a tih thu a sawi bawk. Hemi denchhen hian Chawngte 'P' Branch YLA te thilpek a hlan nghal a ni.
YMA Vice President Pu K. Lalramenga kaihhruai YMA Library hawnna inkhawmah hian Branch Asst. Secretary Pu Robert Lalrambuatsaiha'n Technical report a pein, YMA Chawngte 'P' Branch Library sak nan hian MLA fund Rs. 6,00,000/- (six lakhs) an dawn thu leh mitlawmngaite tanpuina hrang hrang a vangin Rs. 7,10,655/- sengin sak zawh a nih thu a sawi.
Post a Comment