Lawngtlai, September 16, 2022 : Lawngtlai District Village Council Association te chuan an ngenna anga LADC Executive Committee-in LADC hnuaia Village Council Member-te chu an mahni chenna in (an mahni luahlai) chu House Tax an awl a phalsak chu lawmawm an tih thu sawiin, Chief Executive Member Pu V. Zirsanga leh Pu C. Rongura EM, LAD etc changtu te chungah lawmthu an sawi a. 'Kan dilna te ngun taka min ngaihtuah sak a, VC te dinhmun min hriatchian saktu LADC a Executive Committee member zawng zawngte chungah lawmthu kan sawi bawk a ni,' an ti.
Lawngtlai District Village Council Association chuan hun rei tak kaltaah khan hemi chungchangah hian CEM hnenah ngenna an siam tih sawiin, Pu V. Zirsanga, CEM chuan, 'Village Council member te chu VC member in nih chhungte chuan in in luahlai ngei chu chhiah pekah in awl tur a ni a. Tunah eng emaw hriat fuh tawk loh avangin chhiah in awl lova. LADC Executive Committee meeting hmasa berah kan lo ngaihtuah ang a, in awl ngei tur a ni a. Mahse, Executive Committee thuneihna a nih avangin kan lo ennawn ang e' tiin a chhang.
Political party thenkhat ten VC member chhiah awl chungchangah sorkar demna pawh an lo chhuah hial tawh tih tarlangin, Hei hi LDVCA chuan pawi an tih thu vawiina thuchhuah an siamah an tarlang.
Post a Comment