Lawngtlai, September 20, 2022 : Vawiin khan Lairam Christian Medical Centre & Hospital, Lawngtlaiah Oxygen plant hawn a ni a, Pu V. Zirsanga, CEM LADC chuan khuallian niin a hmanpui,
Khuallian Pu V. Zirsanga, CEM LADC chuan, hun kalta te ngaihtuahin vawiina hetiang khawl kan nei thei leh hawng theite hi keimahni tih nilovin Pathian min thawhsakna a ni a, Pathian chungah lawmthu kan sawi a ni. Amaha kan innghaha kan dil phawt chuan Lalpa'n thil ropui min tihsak zel dawn a ni, a ti a. Thawktu fuihna nei nghalin, mahni mihringpuite chungah hmangaihna lantir a, hmangaihna nen a damlo enkawl a pawimawh thu leh rawngbawlna a ni tih hrereng turin a chah a ni.
Oxygen Plant hi Asia Pacific Baptist Aid (APB Aid) atanga donation an dawn a ni a, kum tir khan Lawngtlai rawn thlengin, an rawn phurhnaah a khawl thenkhat a that loh avangin install nghal mai theih a ni lova, a buaipuitu tur Engineer te tun thla khan Lawngtlai lo kalin, hman theih turin an buaipui. Oxygen Plant hi nuai 14 man a ni a, a phurh man, a pipe line leh a in sak man te nena a vaia senso chu nuai 23 a ni.
Vawiin Oxygen Plant hawnna hun LCMC a neih hi Rev. B. Zazawna Lai, General Secretary, LIKBK chuan a kaihruai a, Dr. B. Zonunsanga, Medical Superintendet-in technical report a pe a, Rev. Dr. LH. Lalpekhlua, AGS i/c Service, LIKBK in Pathian hnenah hlanin, Rev. Dr. C. Lalmuankima AGS i/c Mission, LIKBK in tawpna tawngtai hun a hmang bawk.
LCMC ah hian Oxygen pipe lian hi pot 11 ah fit a ni a, vawikhatah pot 6 a rualin a hman theih dawn a, ward tin hi pipe line hian a thleng vek a ni. Tun hma chuan Oxygen bur hmangin ward tinah damlo te oxygen pek thin a ni a, Oxygen Plant a awm dawn takah chuan pipe line hmangin damlo khum bulah oxygen pek a ni tawh dawn a ni. Tin, Oxygen bur hi Zuangtuiah refill a ngai a, Oxygen khaihlak a awm thin a, tunah chuan power awm loh emaw generator pawh tha lo se Jambo hmangin Plant atang hian oxygen hi an pe chhuak thei dawn a ni.
Post a Comment