Kohhran dangte nena inpumkhatna chungchangah Mizoram Synod Puipate leh LIKBK Puipate an inkawm

Lawngtlai, September 30, 2022 : Vawiin khan Mizoram Synod Puipate chuan LIKBK hmunpui tlawhin, Synod Inkhawmpuiin a lo Passed tawh, Mizoram chhunga Kohhran dangte nena inpumkhatna chungchangah hmalak ni rawhse tih bawhzuina kal zelah Mizoram Synod Puipate leh Lairam Isua Krista Baptist Kohhran Puipate te chuan inkawmhona an nei.

He inkawmhona, Lairam Isua Krista Baptist Kohhran Assembly Committee room, Lawngtlaia neih hi LIKBK Assembly chairman Upa Zahranga'n a kaihruai a, Synod Puipate chuan Synod inkhawmpui thu Passed tawh chungchang sawiin, Kohhran dangte nena Inpumkhatna neia, Lalpa rawngbawl ho chu tun dinhmunah a pawimawh takzet tih sawiin, Synod atanga an thuken te an sawi lang bawk.  

Mizoram Presbyterian Kohhran leh LIKBK hian rawngbawlna kawng hrang hrangah thawhhona thuthlung an lo siam tawh a, tun tuma Synod Puipa ten Mizorama Kohhran inpumkhatna tura hma an lakna chu LIKBK Assembly hruaitute chuan tha an tih thu leh an thlawp tlat thute, a tul anga thawhpui an tum thu inkawmhonaah hian an sawi.

Nimin lamah khan Synod puipate hian Lunglei Serkawna BCM hmunpui ah BCM puipate nena inkawmhona an lo nei tawh a, he an inkawmhonaah hian Kohhran inpumkhatna atana thawhhona chu tha an tih thu te, Synod hmalakna chu BCM chuan uluk taka an lo zir chian tur thute sawiin, hlawk takin an lo inkawmho tawh a ni.

Tun tuma Synod Puipate Kohhran Inpumkhatna tura feh chhuakte hi Rev. Dr. K. Lallawmzuala, Executive Secretary, Rev. PC. Pachhunga, Finance Officer, Rev. Dr. Lalhmangaiha leh Upa Ronghaka, PressCom Manager te an ni.