Lawngtlai, September 22, 2022 : CYLA Kumpuan Committee chuan NH2 (Lawngtlai to Tuipang) Road extention neih meka PMPL - SRC (JV) hnuaia hnathawktu Contractor-te leh Sub-Contractor-te chu CYLA Office-ah kawmin, an hnathawhte rintlak leh țha taka thawk turin an ngen a, an hnathawh tawhah tha tawk lo awm te siamțha leh vek turin an ngen bawk.
September 14, 2022 khan Lawngtlai to Kawlchaw 'W' inkara hnathawh mek te hi Central YLA Kumpuan Committee chuan a hmunah kalin an endik a. Hmun țhenkhata hnathawh zawh tawh, țha lo engemawzat an hmu a, hun lo kal zel turah pawh a țul ang angin he road extention hna hi țha taka thawh a nih theih nan en zui zel an tum tih an sawi.
Central YLA Kumpuan Committee chuan he kawngpui sial lai meka hnathawktute ațangin Cement hralh ruk a awm țhin thu hriat a ni tih sawiin, Cement hman tur zat bituk aia tlem hman a nih hian hna a chhia a, a tlo loh phah em avangin he thil hi CYLA Kumpuan Committee chuan a ngai thutak hle a, hetiang tih chingte hi man chhuah an nih phawt chuan a tul ang angin CYLA Kumpuan Committee chuan hma a la dawn tih an sawi bawk a. Mipuite hetiang ang thil hralh ruk lakah hian fimkhur a, lei sak lo tur leh a titute hria kan awm anih chuan CYLA Kumpuan Committee-ah report hreh lo turin an chah bawk a ni.
YLA hi Lairam chhunga NGO lian ber anih angin, Lairam tan nghet takin a ding zel dawn tih sawiin, CYLA Kumpuan Committee chuan, thil țha leh rotling neih theihna kawngah chuan nawr ngai leh sut ngai a awm pawhin hma an la zel dawn a ni tih an sawi bawk.
Post a Comment