Lawngtlai, September 7, 2022 : September 5, 2022 a Thliarpui leh Thliarte inkara chesual Tuipui Ferry khua, B. Rozamliana ruang zawn hna chu thawh mek zel a ni a, CYLA ruahmannain vawiin hian Lawngtlai YLA town branch pahnihte; YLA New Vengpui Branch leh YLA Bethel Veng Branch ten ruang zawn hna hi an thawk a, New Vengpui YLA hi member 25 thawkchhuakin, MTP Tuipui Ferry hnenah Diesel 20litres leh Rs. 3,000 an hlan a, New Vengpui VC te pawhin MTP Tuipui Ferry hnenah hian Diesel 10 litres leh Rs. 2,000 an hlan bawk. Bethel Veng YLA hi member 15 an thawkchhuak a, MTP Tuipui Ferry hnenah Alu bag 10 hnenah an hlan bawk. Tin, YLA AOC Branch lam atangin OB te leh mi engemawzat an rawn thawkchhuak bawk a ni.
Tuipui Ferry chhiat tawhna tanpui nan Pu N. Lalzarzova BDO chuan District Disaster Management Authority aiawhin vawiin khan CYLA hnenah Rs. 3000 leh Silpoulin 3 a hlan a, CYLA aiawhin Disaster Response Committee Secretary Pu M. Saingura'n a dawng a. Pu M. Saingura hian Tuipui Ferry MTP te hnenah CYLA Team aiawhin hlanna a nei bawk a ni. CYLA team hi Pu T. Lalremsanga, AGS ho a thawk chhuak an ni.
Ruang hi la zawn mek zel a ni a, chanchin buatsaih lai thleng hian hmuh a la ni lova. Tuipui Ferry chhiattawhnaah hian MTP SHQ Ramibawk hruaituten an thutchilh a. Tuipui Ferry MTP te nen ruang zawn hna hi thawh mek zel a ni.
Sunday liamta, September 4, 2022 khan CYLA Disaster Sub-Committee chuan an lo tum lawk angin Ferry MTP te hi Pocket Mike an hlan tawh a, tuitla awm hnu thawhtan zan khan Pu T. Lalremsanga leh CYLA Disaster Chairman Tv. HC Malsawmtluanga leh Member Tv. Rinawma te kal leh in Search light 2, Torch light 3, Battery box 1, Vest leh Silpoulin te CYLA aiawhin an pe leh bawk.
Post a Comment