Kawngpui zauh mekah leivung paih dan dik tawk lo leh hnathawh dan dik tawk lo a awm
Lawngtlai, September 15, 2022 : Central YLA hruaitute chuan nimin khan an President Pu Hc. Vanlalruatpuia hovin Lawngtlai - Kawlchaw inkar National Highway, zauh hna thawh mek kalchilhin, hnathawh kalmeka dik lo deuha hnathawh leh ngaihmawhawm an tih laite an enfiah.
CYLA hruaitute chuan kawngpui zauh hna thawh mekah hna tha tawk leh leivung paih danah fel lo tam tak a awm tih sawiin, company hotute nen an enfiah a. Kawngpui zauh hna thawh kalmekah hian leivung paih danah fel tawk lo, leivung paihna tur hmun (spoiled bank) nilo, kawngsir remchanga leivung nawr liam mai a nasa hle a, heng leivung a paihna tur ni lova paih hian ram leh luidung nasa takin a tichhia a ni tih CYLA hruaitute chuan an sawi bawk. Hei bakah hian lungrem (retaining wall) siam te chu an hmanraw hman leh an siam danah duhthu a sam loh bakah heng lungremtute hian lungremna tur atana Cement an dawn te an hralh ru thin a ni tih a hmunah, a tak ngeiin an fianfiah nghal bawk.
CYLA President Pu Hc. Vanlalruatpuia chuan, heti anga ram leh hnam hmasawnna tur, ro tling tur chhe taka thawh anih hi a pawi hle a, CYLA chuan enfiah mai hi duhtawk lovin a tul ang leh a theihna chin chinah chak takin hma kan la zel dawn a, a tha thei angbera kawngpui hi siam anih theihnan theihtawp kan chhuah zui zel dawn a ni, a ti a. Pu Joseph Lalhmingthanga, Gen. Secretary pawhin kawngpui siam hnathawh chu chak takin kal sela an duh tih sawiin, chutihrual chuan kawngpui siam hna thawh avanga kan ram lui leh khawmualin nasa taka a tuar leh anih dan tur anga hna thawh a nilo chu CYLA chuan pawi a tiin a duh lova, a theih ang ang a an enzui zel tur thu a sawi bawk.
CYLA hruaitute chuan kawngpui zauh hnathawktu, company hotute leh an hnuaia sub-contract a lungrem leh hna dang thawktute chu vawiin hian CYLA Office-ah ko khawmin inbiakna an neihpui nghal dawn a. Kaladan Multi-Modal Transit Transport Road hnathawh pawh a hmunah enzui nghal an tum bawk.
Post a Comment