Rauthla, September 23, 2022 : Pu V. Zirsanga, CEM LADC chuan vawiin YLA Day ah YLA member zawng zawng te chibai a buk thu a sawi a, pawl ropui tak YLA lo dintu leh hruaitute zahna chibai bukin, pawl an kaihhruai tawhna zawng zawngah lawmthu a sawi.
Pu V. Zirsanga chuan, YLA chu tute emaw tana din a ni lova, mi hausa leh rethei, mi lian leh mi te zawng zwng huapzo pawl a nihna hi a ropuina leh a hlutna tizualtu a ni a ti a. YLA hian a dinchhan ang takin mi retheite dinhmun harsat zawk te, lusun khawharte a dawmkangin a tanpui thin a, YLA member zawng zawng te hian kan hnam rohlu tak Tlawmngaihna hi chhawmnung tur leh midangte zirtirtu i ni zel ang a, a ti. Ram leh hnam humhalh kawngah YLA member te hi a sulsutu kan nih zel a pawimawh, a ti a. Kan tawng, kan hnam lam leh incheinate hi kan hlut a, kan ngaihsan a tul a. Kan tawng a boral a, kan hnam lam te incheinate a boral lohna turin theihtawp kan chhuah a ngai tak meuh meuh a ni, a ti.
Pu V. Zirsanga, CEM LADC chuan, vawiina kan ram leh hnam min runtu, kan thalaite dimna leh khawngaihna nei miah lova min suat mektu ruihhlo lakah YLA member-te kan fihlim a ngaih thu sawiin, ‘vawiina thalaite hi kan hnam future in ni a, ruihhlo bawia in tan zawh a, he thil hian a ei zo che u a nih chuan he ram leh hnam hi a boral mek tihna a ni ang’ a ti.
YLA member, Branch leh Central YLA anga ruihhlo kan dona kawngah tunhmaa kan tih aia nasa leh taima zawka kan thawh a ngai tih sawiin, CEM chuan, CYLA in kan ram leh hnam chhanna tur ruihhlo a dona kawngah hian mipui ten kan thlawp a ngai a, kan tanpui a ngai takzet a ni, a ti. Ruihhlo dona kawngah chet nat deuh chang an nei a nih pawhin kan ram leh hnam, kan thalaite chhanchhuahna tur a ni tih kan hriatsak a tul thu sawiin, YLA sawi chhe zawng leh a tha tithuanawp zawnga kan awm loh a tha in ka hria, a ti.
CEM chuan, YLA innghahna chu Pathian ni zel se a duh thu sawiin, Kristianna nena inmawi thultih leh mi rethei zawk te leh tanpui ngaite chhawmdawla dawmkangtu ram leh hnam tana sual do zel turin ka ngen a, duhsakna ka hlan a ni, a ti.
Post a Comment